Túrkistan oblysynda kóktemgi egin naýqanyna daıyndyq pysyqtaldy
TÚRKІSTAN. QazAqparat - Túrkistan oblysy, Jetisaı aýdanynda kóktemgi egin naýqanyna daıyndyq jumystary pysyqtaldy. Aýdan ákimi Jamantaı Beısenbaevtyń qatysýymen ótken kezekti jınalysta aýyl sharýashylyǵy maqsatyndaǵy ıgerilmeı jatqan jerlerdi túgendeý máseleleri sóz boldy, dep habarlaıdy QazAqparat tilshisi.
Basqosýda aýyl okrýgterindegi ıgerýsiz jatqan egistik alqaptardyń tizimderi jasalyp, ıelerin anyqtaý máselesi kóterildi. Aýdan basshysy osy maqsattaǵy jumystardy áli de shırata túsý qajettigin tapsyrdy. Sondaı-aq, alqaptardy kóktemgi eginge daıyndaý da erekshe qarqyn alý tıistigin atap ótti. Kóktemgi eginge ázirlik máselesinde jerdi aıdaý, sor shaıý, pal alý jumystarynyń barysy talqylandy. Aýdandaǵy aýyldyq okrýgterde kógaldandyrý, abattandyrý sharalarynyń qarqyny da kóterildi. Atalǵan máseleler boıynsha aýdan ákimi Jamantaı Beısenbaev tıisti sala basshylaryna naqty tapsyrmalar júktep, ony oryndalý merzimderin bekitti.
Budan ózge, jıynda sút óndirý máseleleri sóz boldy. Sala mamandarynyń sózinshe, ónerkásibi órkendep, otandyq óndirisi órken jaıǵan aýdanda bul baǵytta atqarylyp jatqan jumystar qarqyn alǵan. Máselen, asyl tuqymdy iri qara ustaǵan qojalyqtardyń tabysy artyp, qoradaǵy maldyń basy 46 myńǵa jetken. Saýyn sıyrlar sany 25 myńnan asyp, sonyń arqasynda ótken jyly aýdanda 43 myń tonna sút óndirilgen. Sút ónimderin óńdeıtin eki óndiris orny jumys isteıdi, olar ozyq tehnologııalarmen jabdyqtalǵan. Táýligine 20 tonna sút óńdeýge qaýqarly.
