Túrkistan oblysynda kóktemgi dala jumystaryn júrgizýge 37 myń tonna janarmaı bólingen
TÚRKІSTAN. QazAqparat - Túrkistan oblysynda aǵymdaǵy jyly egistik kólemin 843,4 myń gektarǵa ulǵaıtý josparlanyp otyr. Bul týraly oblys ákimi Ómirzaq Shókeev Úkimettiń selektorlyq otyrysynda baıandady, dep habarlaıdy QazAqparat tilshisi.
Aımaq basshysynyń sózinshe, kartop, kókónis, baqsha daqyldarynyń egis kólemi 5,3 myń gektarǵa artqan. Sóıtip jalpy aýmaǵy 125,5 myń gektarǵa jetken. Ásirese maıly jáne mal azyǵy daqyldary artyp, 215,6 myń gektarǵa ornalastyrylǵan.
«Kóktemgi dala jumystaryn merziminde aıaqtaýǵa tolyq múmkindik bar. Bıylǵy jyldyń ónimi úshin egilgen 177,6 myń gektar kúzdik bıdaıdyń jaǵdaıy jaqsy, ústep qorektendirý jumystary bastaldy. Kóktemgi dala jumystaryn júrgizýge qolda bar 21,4 myń dana aýyl sharýashylyǵy tehnıkalarynyń 92%-y daıyn. Búgingi kúnge, josparlanǵan jazdyq egistiktiń 59,3 myń gektary egildi nemese 12%-ǵa oryndaldy. Agroqurylymdar jazdyq daqyldardyń tuqymymen tolyq qamtamasyz etilgen»,-dedi Ómirzaq Shókeev.
Oblys ákimi sondaı-aq, óńirde kóktemgi dala jumystaryn júrgizýge 37 myń tonna janarmaı bólingenin jetkizdi. «Agrarlyq nesıe korporatsııasy» AQ-y tarapynan nesıelendirýge 4,5 mlrd teńge qarjy bólinip, onyń 3 mlrd. teńgesine ótinim maquldanǵan. Budan bólek, ósimdik sharýashylyǵyn qoldaýǵa 7,4 mlrd teńge baǵyttalyp otyr. Byltyr «Bir alqaptan jylyna 2-3 ónim alý» baǵytynda 2 myńdaı joba júzege asyrylyp, 262 myń tonnadan astam ónim óndirildi. Nátıjesinde qosymsha 18,4 mlrd teńgeniń ónimi shyǵarylǵan. Osy jobanyń tıimdiligine oraı, aǵymdaǵy jyly 6 myń gektarǵa 2 760 jobany júzege asyrý bastalǵan.
«Sondaı-aq, jeke qosalqy sharýashylyqtarǵa tamshylatyp sýǵarý tehnologııasyn endirý arqyly aýyl sharýashylyǵy ónimderin óndirý jobasy qolǵa alynǵan. Nátıjesinde 286 joba júzege asyrylyp, ár otbasy 1 mln teńgeden tabys tapty. Onyń ishinde «Eńbek» baǵdarlamasymen jańa bıznes-ıdeıalardy iske asyrý memlekettik granty esebinen 105 joba qarjylandyryldy. Aǵymdaǵy jyly 300 joba júzege asyrý josparlanýda.Oblysta jylyjaılar kólemin 1 400 gektarǵa ulǵaıtý kózdelýde»,-dedi óńir basshysy.
Sonymen qatar, Túrkistan oblysynda qarqyndy baý sharýashylyǵy keńinen damyp, kólemi 3 myń gektardan asqanyn atap ótti. Bir myń gektardan asatyn alqapqa qosymsha otyrǵyzylmaq. Sý únemdeý tehnologııalary 24,1 myń gektarǵa endirilip, 10,2 myń gektarǵa endirý jumystary júrgizilýde. Osy oraıda, «Túrkistan qalasy aýmaǵynda azyq-túlik beldeýin qalyptasyrý» jobasy aıasynda 11 myń gektarǵa jańbyrlatyp sýarý tehnologııasyn endirý kózdelip otyr. Qazirgi tańda azyq - túlik beldeýinde 1,6 myń gektarǵa jańbyrlatyp sýǵarý mashınalary ornatylyp, eki ónim alynýda. Tájirıbe tehnologııanyń tıimdiligin kórsetti. Daqyl túrine qaraı aǵyn sýdy 2-3 esege únemdep, ónimdilikti 2-3 esege artqan.
