Túrkistan oblysynda kóktaıǵaqtan kólikterdiń júrýi qıyndaı tústi
Kún raıynyń buzylýyna baılanysty Túrkistan oblysyndaǵy jaǵdaı kúrdelene tústi. Jańbyr sońy kóktaıǵaqqa ulasyp, kólikterdiń júrýi qıyndap barady. Tipti, respýblıkalyq mańyzy bar joldarda da kólik qozǵalysyna shekteýler qoıylyp jatyr.
Túrkistan oblystyq Tótenshe jaǵdaılar departamentiniń málimetinshe, saǵat 19:00-den bastap «Qorǵas-Almaty-Taraz-Shymkent-Tashkent» tasjolynyń 593-632 shaqyrymyndaǵy ýchaskede kólik qozǵalysy toqtaǵan. Túlkibas aýdanynda kún sýytyp kóktaıǵaq bolýyna baılanysty Mashat aýylynyń tusynda avtokóliktiń barlyq túrine joldar jabylǵan.
Sondaı-aq, áleýmettik jelilerde de kóktaıǵaqqa qatysty vıdeolar tarap jatyr.
Solardyń birinen Jambyl men Túrkistan oblystarynyń shekarasyndaǵy kóktaıǵaqtan qozǵala almaı turǵan kólikterdi kórýge bolady. Al, bir jolaýshy tasjolda syrǵanyp, muzdyń qaýiptiligin kórsetken.
