Túrkistan oblysynda qoǵamdyq oryndar dezınfektsııalanyp, shekteý kúsheıdi

TÚRKІSTAN. QazAqparat – Túrkistan oblysynda halyq shoǵarlanatyn jerler zalalsyzdandyrylyp, shekteý kúsheıtildi. Іndet juqtyrǵandar sany boıynsha kóp tirkelgen Jetisaı aýdanynda turǵyndardyń kóshede maskasyz júrýine tyıym salyndy, dep habarlaıdy QazAqparat tilshisi.

Jetisaı aýdanyndaǵy barlyq eldi mekenderde kósheler men ortalyq alańdar, balalardyń oıyn alańshalary men saıabaqtar, skverler men dúkender, bazarlardyń mańy kúnine eki ret zalalsyzdandyrylýda. Barlyq jerde jaýapty mamandardan arnaıy shtab qurylyp, atqarylatyn jumystyń jospary pysyqtalyp jatyr.

Al, Saryaǵash aýdanynda vırýs juqtyrǵan naýqas turatyn Eńkes eldimekeninde karantın engizilip, qorshaýǵa alyndy. Derttiń taralmaýyna baılanysty eldimekende avtokólik quraldarynyń barlyq túrleriniń jáne azamattardyń kirip-shyǵýyna tyıym salyndy.

Barlyq joldar men aıaqjoldar, irgeles aıaldama keshenderi men saýda alańdarynyń aýmaqtary, eldi mekenniń kireberisteri men aýlalar kúndelikti dezınfektsııalyq rejımge kóshirilgen.

Atalǵan indettiń taralýyna tosqaýyl qoıý maqsatynda Báıdibek aýdanynda da qaýipsizdik sharalary qolǵa alynǵan. Aýdan ortalyǵy Shaıan eldi mekenindegi kósheler men mekemeler jáne kópqabatty turǵyn úılerdi dezınfektsııalaý jumystary bastaldy.

Bul jumysty sý búrkeıtin avtokólik jáne arnaıy kıim kıgen jaıaý júrginshi top atqaryp jatyr.