Túrkistan oblysynda kirister departamenti І 128,9 mlrd teńge qarjy óndirgen
TÚRKІSTAN. QazAqparat - Túrkistan oblysynyń Memlekettik kirister departamenti jyl basynan beri 11 aıda 128,9 mlrd teńge qarjy óndirgen. Bul týraly Túrkistan oblysynyń óńirlik kommýnıkatsııalar qyzmetinde oblystyq Memlekettik kirister departamenti basshysynyń orynbasary Erkin Elshibekov málim etti, dep habarlaıdy QazAqparat tilshisi.
Erkin Elshibekovtyń aıtýynsha, komıtet quzyretine kiretin túsimderdiń ósý qarqyny 17,2 mlrd teńgege artqan. Onyń ishinde, respýblıkalyq bıýdjet - 14,1 mlrd teńgege, jergilikti bıýdjet túsimderi - 3,1 mlrd teńgege óskeni baıqalady.
«Aǵymdaǵy jyldyń 5-shi jeltoqsanynda jınaqtalǵan málimetke sáıkes, jyl qorytyndysymen respýblıkalyq bıýdjet jospary 5,9 mlrd teńge artyǵymen oryndalady dep boljamdalyp otyr. Sondaı-aq, jalpy jergilikti bıýdjettiń jospary 100,5 paıyz oryndalady dep mejelenýde», - dedi Erkin Elshibekov.
Sondaı-aq, óńirde memlekettik qyzmet kórsetý sapasyn kóterý boıynsha negizgi jumystar qyzmettiń elektrondy formatta kórsetilýine baǵyttalyp otyr. Atap aıtqanda, «Elektrondyq úkimet» veb-portaly men «Salyq tóleýshi kabıneti» veb-qosymshasy júıeleriniń jumys jasaýy elektrondy túrde qyzmet alýdyń úlesin aıtarlyqtaı arttyryp otyr.
«Elektrondy túrde qyzmet alýǵa arnaıy barlyq aýmaqtyq basqarmalar ǵımarattarynda jáne aýyldyq ákimshilikterde «Salyq tóleýshi termınaly» ornatylǵan. Al, elektrondy túrde qyzmet alýǵa múmkindigi joq salyq tóleýshiler aýmaqtyq kirister organdaryna baryp, barlyq aýmaqtyq basqarmalarda jumys jasaıtyn «Aqparattardy qabyldaý, óńdeý jáne berý» ortalyqtarynan qyzmet alýyna bolady. Bul jerde de sybaılas jemqorlyqty boldyrmaý úshin «Bos tereze» qaǵıdasymen qyzmet kórsetý qarastyrylǵan», - dedi departament basshysynyń orynbasary.
Sonymen qatar, qazirgi tańda kez kelgen salyq tóleýshi azamat aýmaqtyq memlekettik kirister basqarmalaryna salyqtyń eseptelýi, tólenýi, jer, múlik jáne kólik salyqtary boıynsha «WhatsApp» messendjeri arqyly suraq qoıyp, aqparat alýyna múmkindik jasalǵan. Atalǵan qyzmetti paıdalaný úshin dúısenbi-juma kúnderi saǵat 09-00 ben 18-30 aralaǵynda 8 771 898 9255 nómirine saýal joldaıdy. Budan ózge, www.kgd.gov.kz ınternet resýrsy jáne «Elektrondy úkimet» portaly «Salyq bereshektiń joqtyǵy týraly aqparat» elektrondy servısi arqyly onlaın rejiminde JSN boıynsha salyq bereshektiń bar-joqtyǵy jaıly aqparat alýlaryna bolady.
