Túrkistan oblysynda keýrek ósimdigin joıyp jatqan Tájikstan azamattary anyqtaldy
Kesheden beri áleýmettik jelide Túrkistan oblysynyń aýmaǵynda dárilik qasıeti mol ósimdik retinde tanylǵan keýrektiń tamyryn qazyp, qaıta óspeıtindeı hálge túsirip jatqan azamattar týraly vıdeo taraǵan bolatyn. Osy aqparattyń jarııalanýyna baılanysty Arys qalasy ákimdigi janynan arnaıy jumys toby qurylyp, oqıǵa ornyna bardy.
Qala ákimdiginiń málimetinshe, arnaıy top ókilderi jelide taraǵan derekter negizinde keýrek qazý jumystaryna Tájikstan Respýblıkasynyń azamattary kelgenin anyqtaǵan. Olar dalaly alqapta shatyr tigip, keýrek qazýǵa daıyndalyp jatqany belgili bolǵan. Al jer mamandarynyń zerdeleý jumystary nátıjesinde zańsyz áreketter oryn alǵan aýmaq Otyrar aýdanynyń aýyl sharýashylyǵy maqsatyndaǵy jaıylymdyq jeri bolyp shyqty. Arnaıy top quramynda kelgen quqyq qorǵaý organynyń ókilderi zańsyz jumysqa jegilgen azamattar men olardyń dálel, dáıekti zattaryn Otyrar aýdandyq polıtsııa bóliminiń qymetkerlerine tapsyrdy.
«Arys qalasy ákiminiń orynbasary Erǵalı Qýandyq bastaǵan jumys toby men oqıǵa kýágerleri zańǵa qaıshy áreketter jóninde akt toltyryp, óz quzyreti sheńberinde Otyrar aýdany ákimdigine qyzmettik hat joldady. Qazirgi kezde Arys qalasynyń ákimi Gúljan Qurmanbekovanyń arnaıy tapsyrmasyna oraı, aýyldyq okrýgter ákimine shuǵyl tapsyrma berilip, Arys qalasy aýmaǵyndaǵy dárilik ósimdikterdi qorǵaý maqsatynda qatań baqylaý jumystary júrgizilýde», - delingen ákimdik habarlamasynda.