Túrkistan oblysynda kenege qarsy kúres jumystary bastaldy
TÚRKІSTAN. QazAqparat – Túrkistan oblysynda keneden juǵatyn Kongo-Qyrym gemorragııalyq qyzbasy sekildi asa qaýipti juqpaly aýrýlardyń aldyn alý boıynsha atqarylatyn is-sharalar qolǵa alyndy.
Bul týraly QazAqparat Túrkistan oblysy ákiminiń baspasóz qyzmetine silteme jasap habarlaıdy.
Túrkistan oblystyq aýyl sharýashylyǵy basqarmasy bıyl «Enzootııalyq» aýrýlarǵa qarsy kóktemgi zalalsyzdandyrý jumystaryn 30 naýryzdan bastaıdy.
Zııankesterdiń tabıǵı oshaqtarynda sanıtarlyq-epıdemııaǵa qarsy sharalar uıymdastyrylýda.
Epıdemııalyq aýmaqtarda mundaı sharalar jyl saıyn keminde eki ret, kóktem, kúz mezgilderinde ótkiziledi. Túrkistan oblysyndaǵy veterınarııa salasy mamandarynyń aldaǵy bir aılyq jospary aýqymdy. Bıylǵy 66,8 mln sharshy metr qora men 28,5 mln sharshy metr mal ıirimder men sýattar, butalar zalalsyzdandyrylady. 2,5 mln iri qara men 8,4 mln ýaq mal dárilenedi.
Aýdan, qalalardaǵy veterınar mamandar qajetti qurylǵylar men dári-dármektermen, arnaıy kıimdermen tolyq qamtamasyz etilgen. Oblys boıynsha 2018 jyly 3360 adam kene shaǵyp aýrýhanaǵa túsken. Byltyr bul kórsetkish 12 % azaıǵan.
