Túrkistan oblysynda keden beketteri jańartylýda

TÚRKІSTAN. QazAqparat – Túrkistan oblysynda shekaralyq keden beketterdiń aýmaǵyn keńeıtý men tolyq qaıta tehnıkalyq jaraqtandyrý, ótkizý qabilettiligin ulǵaıtý jumystaryn júrgizýde. Bul týraly Óńirlik kommýnıkatsııalar qyzmetiniń kóshpeli brıfınginde departamenttiń baspasóz hatshysy Baıan Tulǵabaeva málimdedi, dep habarlaıdy QazAqparat tilshisi.

Baıan Tulǵabaevanyń sózinshe, aǵymdaǵy jyldyń shilde aıynan bastap Túrkistan oblysy Keles aýdanyndaǵy tranzıttik baǵyttaǵy mańyzy zor «Baýyrjan Qonysbaev» keden beketin qaıta qurý jumystary bastalǵan.

«Bul joba iske qosylǵan kezde avtokólikterdiń kirip-shyǵý jolaqtary 2 den 6 jolǵa deıin (3 jolaq kirý, 3 jolaq shyǵý baǵyty) ulǵaıyp, baqylap-ótkizý jumystary jedeldetiledi jáne taýar tasýshy avtokólikteriniń ótý sany 200-den 1000-ǵa deıin ulǵaıady. Jospar boıynsha qurylystyń aıaqtalý merzimi 2020 jyldyń mamyr aıy», - dedi departamenttiń baspasóz hatshysy.

Qazirgi tańda josparǵa sáıkes, qaıta qurý jumystarynyń alǵashqy kezeńi júrgizilýde. Osyǵan oraı, departament tarapynan shekaralyq keden beketine baratyn joldarda júk avtokólikterdiń shoǵyrlanýyn boldyrmaý maqsatynda, atalǵan keden beketten ótetin júk tasymaldaýshylarǵa oblystyń basqa shekaralyq keden beketterinen ótý týraly túsindirme jumystary júrgizilip jatyr. Budan bólek, shekaralyq keden beketterge baratyn aımaqtyń mańyzy bar joldarda «Baýyrjan Qonysbaev» keden beketinde qurylys júrip jatqany týraly aqparattyq bılbordtar ornatylǵan.

Sonymen qatar, júrgizýshiler úshin departamenttiń resmı saıty men áleýmettik jelilerindegi paraqshalarynda «Baýyrjan Qonysbaev» keden beketinde qurylys jumystarynyń júrýi sebebinen Túrkistan oblysynda ornalasqan «Atameken», «Qaplanbek», «Qazyǵurt» keden beketterinen ótýge bolatyndyǵy týraly aqparat jarııalanǵan.

Sondaı-aq, departamenttiń resmı saıtynda jáne áleýmettik jelilerinde ótkizý pýnkterinde kezekte turǵan júk avtókólikteriniń sany týraly aqparat kúndelikti eki ret (tańerteńgi jáne keshki) habarlanady.

Kóshpeli brıfıng aıasynda BAQ ókilderine Saryaǵash aýdanynda ornalasqan «Jibek joly» keden beketindegi aǵymdaǵy jóndeý jumystary tanystyryldy. Bıyl qazan aıynyń basynda bastalǵan árleý jumystary aı sońynda aıaqtalmaq. Keden beketindegi ǵımarattarda júrgizilip jatqan qurylys jumystary azamattarǵa qolaıly jaǵdaı jasaýǵa baǵyttalyp otyr.