Túrkistan oblysynda qazaq kúresinen dástúrli halyqaralyq týrnır aıaqtaldy
ShYMKENT. QazAqparat - Túrkistan oblysynda qazaq kúresinen dástúrli halyqaralyq týrnır óz məresine jetti. Qajymuqan Muńaıtpasulynyń 149 jyldyǵyna oraı uıymdastyrylǵan saıysqa Reseı, Ózbekstan, Mońǵolııa elderimen qatar elimizdiń barlyq oblystarynan 300-ge tarta palýan qatysty, dep habarlaıdy QazAqparat tilshisi.
Ordabasy aýdany, Temirlan eldi mekenindegi Qajymuqan atyndaǵy ortalyq stadıonynda ótken jarys eki kúnge jalǵasty. Boz kilem kórkin qyzdyrǵan sportshylar 8 salmaq dárejesinde jeńimpazdy anyqtady.
Bul jolǵy týrnırge palýandar joǵary daıyndyqpen kelgenderin baıqatty. Ár beldesýde kórermenderdi sheberlikterimen tańqaldyryp, tartysty jekpe-jekter ótkizdi. Ózara myqtyny anyqtaǵan dodada túıe palýanǵa tigilgen sý jańa «Nıva» avtokóligi sarapqa salyndy. 32 sportshy beldesýge tilek bildirip, nátıjesinde júldeli úshinshi oryndy Mońǵolııa palýany Dorj Anar ıelendi. Al, aqtyq synda almatylyq Rýslan Ábdirazaqov pen mońǵolııalyq Serik Berdimurat kúresti. Saıys qorytyndysymen mońǵol balýanynyń jaýyrynyn jerge tıgizgen Rýslan Ábdirazaqov bas júldeni jeńip aldy. 
Jeńimpazǵa temir tulpardy Ordabasy aýdanynyń ákimi Qaırat Joldybaıuly men oblystyq Dene shynyqtyrý jəne sport basqarmasynyń basshysy Polat Qyryqbaev tabys etti. Túıe balýan endi «Qazaqstan barysy» týrnırinde baǵyn synaıtyn bolady.
