Túrkistan oblysynda qaı salany jemqorlyq jaılaǵan

NUR-SULTAN. QazAqparat – Túrkistan oblysy boıynsha sybaılas jemqorlyq áreketi kóbinese qaı salada anyqtalady. Bul suraqqa QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Hákim Kóshqalıev jaýap berdi, dep habarlaıdy QazAqparat tilshisi.

«Bıyl 7 aıdyń ishinde bizdiń oblysta 57 jemqorlyq qylmysy tirkeldi. Olardyń ishinde 21 paraqorlyq, 4 alaıaqtyq jáne 18 jymqyrý áreketi. Oblysta sybaılas jemqorlyq áreketinen kósh bastap turǵan sala - turǵyn-úı qatynasy. Ol boıynsha 12 qylmys, ekinshi orynda polıtsııa organdary 9 qylmys, odan ári bilim salasy 8, áleýmettik qyzmet 7, jer qatynastary 6 jáne qurylys salasynda 5 qylmys tirkelip otyr. Árıne barlyq jemqorlyq áreketter boıynsha sotaldy tergeý jumystary júrip, ár istiń aq-qarasy qaraldy. Sonymen qatar, jemqorlyq áreket oryn alǵan ujymmen túsindirý jumysy ótkiziledi. Ondaǵy maqsat – sybaılas jemqorlyq áreketin endigi ýaqytta boldyrmaý», - dedi Hákim Kóshqalıev Antikor Live jobasynyń tikeleı efırinde.

Sondaı-aq, departament basshysy jemqorlyqtyń aldyn alý maqsatynda halyq arasynda túsindirý jumystarynyń jıi uıymdastyrylatynyn alǵa tartty.

«Jyl basynan beri jeke ózim 43 azamatty túrli suraqtar boıynsha qabyldadym. 2021 jyldyń 7 aıynda 1 myńnan asa túrli aryz-shaǵym kelip tústi. Kúnine azamattardan 6-7 shaǵym kelip túsip jatady. Árıne, biz kezegimizde halyq únine qulaq asatyn memleket tujyrymyna saı, tıisti jaýapty shuǵyl túrde berýge tyrysamyz», - deıdi ol.