Túrkistan oblysynda qaýipsizdik sharalary kúsheıtildi

TÚRKІSTAN. QazAqparat - Túrkistan oblysynda koronavırýs tirkelgen joq. COVID-19-ben kúres jáne indettiń aldyn alý oblys boıynsha keń aýqymda júrgizilip jatyr, dep habarlaıdy QazAqparat oblys ákiminiń baspasóz qyzmetine silteme jasap.

Búginnen bastap Túrkistan oblysynyń aýmaǵyna azamattardyń kirip-shyǵýyn baqylap, tekserýden ótkizetin blok-posttar sany 38-ge jetkizildi. Baqylaý beketterinen táýligine 36 myńnan astam adam tekserýden ótkizilýde. Oblys ákimi Ómirzaq Shókeevtiń tapsyrmasyna sáıkes, óńirdegi blok-posttarda beınebaqylaý kameralary ornatylǵan. Oǵan qosa «Sergek» kameralary arqyly polıtsııa qyzmetkerleri kólikterdiń baǵytyn qadaǵalap otyrady. Barlyq vıdeo 30 kún boıy saqtalady.

Sheteldik nómir taqqan kólikter men Nur-Sultan, Almaty qalalarynan kelgen kólikterdi tirkeýge alý boıynsha qaýipsizdik sharalary kúsheıtilgen. Baqylaý beketterinde polıtsııa, dárigerler men jedel-járdem jáne tótenshe jaǵdaı qyzmetkerleri táýlik boıy qyzmet etýde. Blok-posttardaǵy beınebaqylaý kameralary oblys ákimdiginde qurylǵan ahýaldyq ortalyqqa qosylǵan. Koronavırýs indetiniń taralýyna jol bermeýge jáne jaǵdaıdy saraptamaǵa ala otyryp, halyqqa shynaıy aqparat deregin jarııalap otyrýǵa baǵyttalǵan táýlik boıy jumys isteıtin ahýaldyq ortalyqta barlyq quzyrly basqarmalardyń mamandary jumyldyrylǵan.

COVID-19 pnevmonııasymen kúres úshin Túrkistan qalasyndaǵy qoǵamdyq oryndarda da saqtyq sharalary qatań baqylaýǵa alynǵan. Oblys ákimdiginiń uıymdastyrýmen turǵyndardyń saýaldaryna shuǵyl jaýap berý úshin arnaıy Call–ortalyq jumys isteıdi. Call – ortalyq 109 nómiri arqyly táýlik boıy 24/7 formatta qońyraýlar qabyldaıdy.

Infektsııanyń aldyn alý jáne onymen kúres boıynsha barlyq málimetti Túrkistan oblysy ákimdiginiń «TúrkistanCOVID-19 oblystyq shuǵyl aqparat taratý shtaby» paraqshasynan da bilýge bolady.