Túrkistan oblysynda qatty jelden qulaǵan elektr baǵanalary qalpyna keltirilip jatyr
TÚRKІSTAN. QazAqparat - Túrkistan oblysynda qatty jaýǵan jańbyr men soqqan jeldiń saldarynan zaqymdanǵan elektr jelilerin qalpyna keltirý jumysy júrgizilip jatyr, dep habarlaıdy QazAqparat.
Naýryz aıynyń 13-14 kúnderi aýa raıynyń qolaısyzdyǵynan aýdan, qalalardaǵy 5 338 dana elektr baǵana qulap, 100-ge jýyq eldi meken jaryqsyz qalǵan.
Bul týraly búgin óńirlik kommýnıkatsııalar qyzmetinde ótken brıfıngte energetıka jáne turǵyn úı-kommýnaldyq sharýashylyq basqarmasy basshysynyń orynbasary Baqytjan Polatbekov málimdedi.
Onyń sózinshe, búlingen nysandardy qalpyna keltirý jumysyna oblystyq bıýdjetten 260 mln teńge qarajat bólingen.
«Oqıǵa saldarynan Arys, Kentaý qalalary men Báıdibek, Ordabasy, Otyrar aýdandarynyń elektr jelilerine aıtarlyqtaı zııan keldi. Oblys ákimi Ómirzaq Shókeevtiń ókimimen zardaptyń saldaryn joıý boıynsha arnaıy shtab qurylyp, tıisti sharalar der kezinde uıymdastyryldy. Nátıjesinde «KEGOC» AQ-na qarasty 110 dana elektr baǵanasy tolyǵymen ornatylyp, iske qosyldy. Sondaı-aq, 62 dana SK-26 markaly elektr baǵanalary jáne 3 400 dana oqshaýlaǵysh jetkizildi. Tasymaldaý jáne qalpyna keltirý jumystary jalǵasýda», – dedi B. Ánýarbekuly.
Qalpyna keltirý jumysyna jalpy 170-ten astam tehnıka, 473 adam jumyldyrylǵan.
Jaýapty mamandar jóndeý jumysy 10 sáýirge deıin tolyq aıaqtalatynyn aıtty.
Eske salsaq, aýa raıynyń qolaısyzdyǵyna baılanysty Túrkistan oblysynyń bes aýdanyndaǵy eldimekender jaryqsyz qalǵan bolatyn.
Odan keıin Túrkistan oblysynda 60-qa tarta eldimeken eki aptaǵa jýyq ýaqyttan beri jaryqsyz otyrǵanyn habarlaǵan edik.
