Túrkistan oblysynda Qasym-Jomart Toqaevtyń qoǵamdyq shtaby quryldy
Oblystyq qoǵamdyq shtabty besinshi shaqyrylymdaǵy Qazaqstan Respýblıkasy Parlamenti Májilisiniń depýtaty bolǵan, oblys ákiminiń orynbasary qyzmetin atqarǵan Ulasbek Sádibekov basqarady.
«Nur Otan» partııasy Túrkistan oblystyq fılıalynda ótken brıfıngte Ulasbek Sádibekuly shtabtyń aldaǵy jumystary men quramy jaıynda jan-jaqty aıtyp ótti.
Oblystyq qoǵamdyq shtab 65 adamnan turady. Onyń quramyna tanymal tulǵalar, qoǵam qaıratkerleri, partııa belsendileri, zııaly qaýym ókilderi, oblystyq fılıal saıası keńesiniń músheleri men jastar uıymdarynyń belsendileri bar. Sondaı-aq, ótken saılaý naýqandaryna qatysyp, mol tájirıbe jınaqtaǵan azamattar, úkimettik emes uıym ókilderi de molynan qamtyldy. Búgingi kúni oblystyq jáne aýdandyq, qalalyq 17 shtab jasaqtalyp, quramyna 573 adam engen.
Oblystyq, aýdandyq, qalalyq qoǵamdyq shtabtardyń apparatynyń qurylymy jasaqtalǵan. Shtabta uıymdastyrý, saıası, qoǵamdyq qabyldaý zańgerlik bólimderi men baspasóz-qyzmeti jumys isteıdi.
- Biz zııaly qaýym ókilderimen, aqsaqaldarmen, áleýmettik sala qyzmetkerlerimen, eńbek ujymdarymen, kásipkerlermen, aýyl sharýashylyq salasy mamandarymen, shalǵaı aýyl turǵyndarymen, úkimettik emes uıymdarmen, qurylysshylarmen, bilim, mádenıet, sport, densaýlyq saqtaý salasynyń jáne ózge de sanattaǵy azamattarmen erkin formattaǵy kezdesýlerdi kóbirek ótkizýge kóńil bólip otyrmyz - dedi oblystyq shtab tóraǵasy Ulasbek Sádibekov.
Kandıdattyń baǵdarlamasyn saılaýshylarǵa tolyqqandy jetkizý maqsat etken shtab músheleri oblystyq jelilik keste ázirlep, ol boıynsha saılaýshylardyń basym bóligin qamtýdy josparlap otyr. Mundaǵy maqsat - saılaýaldy baǵdarlamany halyqtyń júregine jetkizip, jan-jaqty nasıhattaý.
Oblys boıynsha 1778 senimdi ókil aýmaqtyq saılaý komıssııasynda tirkelip, kýálikterin alǵan.
12 mamyrda kandıdattyń oblystyq, qalalyq jáne aýdandyq qoǵamdyq qabyldaý bólmeleriniń ashylýy sharasy uıymdastyrylady. Oǵan kez kelgen azamat óziniń usynys-tilegin, pikirin ashyq jetkizýge múmkindigi bar.
