Túrkistan oblysynda kásipkerler jasóspirimderge temeki men alkogol ónimderin satqan
TÚRKІSTAN. QazAqparat – Túrkistan oblysynda kásipkerler jasóspirimderge temeki men alkogol ónimderin satqan. Mundaı zańbuzýshylyq áreketterdi polıtseıleri «Jasóspirim» jedeldetilgen-profılaktıkalyq is-sharasy barysynda anyqtady, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, óńirde 6-10 qańtar kúnderi uıymdastyrylǵan profılaktıkalyq shara barysynda 200-den astam quqyq buzýshylyq anyqtalǵan. Quzyrly organdar men prokýratýra, bilim berý men densaýlyq saqtaý qyzmetkerleri, ata-analar komıtetteriniń ókilderi qatysqan sharada tártip saqshylary polıtsııa bólimine 233 kámelet jasyna tolmaǵan jasóspirimdi jetkizgen. 204 baladan túrli quqyq buzýshylyqtar jasaǵany úshin jaýap alynǵan. Al, 12 ata-anany balalaryna durys tárbıe bermegeni úshin ıývenaldy polıtsııa qyzmetkerleri ákimshilik jaýapkershilikke tartqan. Sondaı-aq, kámeletke tolmaǵan balalardyń oıyn-saýyq mekemelerinde bolýyna jol bergeni úshin 5 kásipker jazalanǵan.
«Reıdtik is-shara kezinde tártip saqshylary 153 kámeletke tolmaǵan balanyń úıinen tys jerde zańdy ókilsiz júrgenin jáne 13 jasóspirimniń túngi ýaqytta oıyn-saýyq mekemelerinde júrgenin anyqtaǵan. Kámelet jasyna tolmaǵandarǵa zańsyz temeki satqan 4 jaıtty jáne 6 alkogol satý deregin tirkegen» delingen habarlamada.
