Túrkistan oblysynda kásipkerdiń úıine qaraqshylyq shabýyl jasaldy
ShÁÝІLDІR. QazAqparat – Túrkistan oblysy Otyrar aýdanynda kásipkerdiń úıine qaraqshylyq shabýyl jasaldy. Qylmystyq oqıǵa aýdan ortalyǵy Sháýildir aýylynda bolǵan, dep habarlaıdy QazAqparat tilshisi.
Betine betperde kıgen úsheý túngi úshter shamasynda kásipkerdiń úıine tereze arqyly kirip, uıyqtap jatqan erli-zaıyptylardy pyshaqpen qorqytqan. Artynsha úı ıesiniń jubaıyn baılap, qymbat tony men altyn buıymdaryn alǵan. Sondaı-aq, 4 uıaly telefony men eki ańshy myltyǵyn da áketken.
Jábirlenýshilerge kelgen shyǵynnyń jalpy kólemi - 1 mln teńge. Qaraqshylar ketken soń kásipker úıine polıtsııa shaqyryp, kómek suraǵan. Oqıǵa ornyna jetken krımınaldyq polıtsııa qyzmetkerleri 4 kúdiktiniń jeke tulǵasyn anyqtap, olardy bir táýlikten soń ustady.
Qaraqshylar Otyrar, Maqtaaral aýdandary men Shymkent jáne Nur-Sultan qalalarynyń turǵyny bolyp shyqty. Shymkent qalasynan ustalǵan kúdiktilerdiń biri buryn sotty bolǵan. Tergeý barysynda urlanǵan zattardy lombardqa ótkizip, qylmysyn jasyrý úshin ańshy myltyǵyn jerge kómip tastaǵany belgili boldy.
«Jedel izdestirý sharalaryn júrgizý barysynda krımınaldyq polıtsııa basqarmasy men Otyrar aýdandyq polıtsııa basqarmasy qyzmetkerleri bul aýyr qylmysty ashyp, kúdikti degen tórt tulǵa ustaldy. Olar ýaqytsha ustaý abaqtysyna qamaldy. Qazirgi tańda tıisti tergeý amaldary júrgizilýde»,- deıdi Túrkistan oblystyq PD krımınaldyq polıtsııa basqarmasynyń bastyǵy Qurmanbek Sahov.
