Túrkistan oblysynda kásipker koronavırýsqa qarsy kúreske 25 mln teńge aýdardy

TÚRKІSTAN. QazAqparat – Túrkistan oblysynda «Nur Otan» partııasy qolǵa alǵan «Biz birgemiz» aktsııasy jalǵasyn tabýda. Kornavırýsqa qarsy kúresti kúsheıtý men kómekke asa muqtaj turǵyndardyń ál-aýqatyn kóterý maqsatynda uıymdastyrylǵan aktsııaǵa óńirdegi kásipkerler, máslıhat depýtattary men metsenattar bir kisideı atsalysyp jatyr, dep habarlaıdy QazAqparat tilshisi.

Azamattyq pen jomarttyq synǵa túsken kezeńde óńirdegi belgili kásipker, metsenat Ráshkúl Ospanálıeva «Túrkistan» áleýmettik-korporatıvtik damý qoryna 25 mln teńge aýdaryp, aıryqsha janashyrlyq tanytty. «Bereke-A» korporatsııasynyń basshysy buǵan deıin de qaıyrymdy isterimen tanylyp júrgen bolatyn.

«Memleket tarapynan indetti taratpaý, eldiń densaýlyǵy men qaýipsizdigin saqtaý maqsatynda keshendi jumys atqarylyp jatyr. Bul qıyn sátte eldiń ár azamaty qoǵamǵa qoldan kelgen kómegin kórsetýi tıis dep esepteımin. Qaýipsizdik erejelerin saqtap, sabyr saqtaı bilsek, bul qıyndyqtan da shyǵamyz», – deıdi kásipker.

Aımaqta kúni búginge deıin «Biz birgemiz» aktsııasy aıasynda Túrkistan oblysynyń aýdan-qalalarynda 2 myńnan astam otbasyna azyq-túlik, gıgıenalyq jáne medıtsınalyq zattar taratyldy.

Bul mindetti oryndaýǵa «Nur Otan» partııasy fılıaldarynyń ókilderi men «jasotandyqtar» jáne eriktiler tartylǵan.