Túrkistan oblysynda kásipker eki otbasyna úı salyp berdi
TÚRKІSTAN.QazAqparat - Túrkistan oblysynda kásipker Syrym Ertaev óz qarjysy esebinen eki otbasyna úı salyp berdi. «Qaıyp ata» JShS basshysy ári «Qazaqstandaǵy 100 jańa esim» jobasyna engen azamat kópbalaly januıalarǵa osyndaı qaıyrymdylyq jasady, dep habarlaıdy QazAqparat tilshisi.
Jomart júrekti kásipkerge alǵysyn bildirgen eki otbasy búginde jańa baspanalaryna qonystandy. Qazaqstanda et eksportynyń áleýetin kóterip, shetelge et tasymaldap júrgen Syrym Ertaev óz kásibi arqyly ózge de aýyldastaryn jumyspen qamtyp otyr. Osylaısha, ol «Qazaqstandaǵy 100 jańa esim» qataryna shynaıy el patrıoty retinde engenin isimen dáleldedi. Aldaǵy ýaqytta da qaıyrymdylyq sharalaryna atsalysýdy kózdep otyrǵan kásipkerge Qazyǵurt aýdanynyń turǵyndary dán rıza.
Qazirgi tańda atalǵan aýdanda qaıyrymdylyq jasaý sharalary jıilep otyr. Máselen, jýyrda ǵana elimizdegi 11 mıllıonynshy qazaqtyń otbasyna aýdan ákimdigi jańa páterdiń kiltin tapsyrdy. Muhtar Ábdirahym Qazyǵurt aýdany Qarabaý aýyldyq okrýgi Úshbulaq aýylynda dúnıege kelgen. Ol Qazaqstanda týǵan 11 mıllıonynshy qazaq bolyp tirkelgen. Muhtardyń ákesi Málik Badambaev aýyl sharýashylyǵymen aınalysady. Anasy Sholpan Kúderbekova - mektepte muǵalim. Úıli bolǵan otbasy el azamattaryna alǵystaryn aıtty.
Sondaı-aq, jergilikti depýtattar Qazyǵurt aýyldyq okrýginiń turmysy tómen 30 otbasyna demeýshilik jasap, azyq-túlikpen kómek kórsetti. Aýdandyq «Jalynda jastar» qoǵamdyq birlestigi oblys jáne aýdan kásipkerleriniń qoldaýymen áleýmettik jaǵdaıy az qamtamasyz etilgen otbasylarǵa úı-jıhazdaryn jáne azyq-túlik alyp bergen. Qaıyrymdylyq is-sharalary aldaǵy ýaqytta da jalǵasyn tappaq.
