Túrkistan oblysynda qarapaıym zattar ekonomıkasy qarqyndy damyp keledi
TÚRKІSTAN. QazAqparat - Túrkistan oblysy ákiminiń orynbasary Meıirjan Myrzalıev «Atameken» kásipkerler palatasynyń oblystyq fılıalynda «qarapaıym zattardyń ekonomıkasy» jobalyq keńse jıynyn ótkizdi. Onda shaǵyn jáne orta bıznesti damytý, ınvestıtsııa tartý máseleleri áńgime arqaýyna aınaldy, dep habarlaıdy QazAqparat.
Oblys ákiminiń baspasóz qyzmetinen málim etkendeı, basqosýǵa óńirdegi «qarapaıym zattardyń ekonomıkasyna» qatysýshy 9 birdeı ekinshi deńgeıli bank jetekshileri qatysty. Olar atalǵan baǵdarlamany iske asyrýdyń tetikterin keńinen talqylady. Jeńildetilgen nesıelendirýge arnalǵan baǵdarlamanyń júzege asýy Memleket basshysynyń erekshe nazarynda ekenin aıtqan Meıirjan Myrzalıev, máseleni ońtaıly sheshý ekinshi deńgeıli bankterdiń jumysyn úılestirýge tikeleı baılanysty ekenin aıtty.
Sondaı-aq, ol oblystyq ákimdiktiń tarapynan jobalardy júzege asyrý úshin qarjy ınstıtýttaryna barynsha qoldaý kórsetiletinin jetkizdi.
Óz kezeginde ekinshi deńgeıli bankterdiń ókilderi jalpy quny 26,3 mlrd teńgelik 15 jobany qarjylandyrýǵa daıyn ekenderin málimdedi. Osy jobalar barlyq jaǵynan qoldaý tapsa, jobalardy júzege asyrý boıynsha Túrkistan óńiri kóshbasshy oblysqa aınalady.
Sonymen qatar, qatysýshylarǵa kepildik quralyn engizý bóligindegi baǵdarlamaǵa engizilgen túzetýler týraly, aınalym qarajatyn tolyqtyrý úshin qarjylandyrý mólsherin 50 paıyzǵa deıin arttyrý jaıy aıtyldy. Odan bólek, jaqyn kúnderi baǵdarlamanyń tıimdiligin arttyra túsý úshin taǵy birqatar túzetýler engiziletini habarlandy. Bul ózgeris nesıe alǵan kásipkerlerge de oń áserin tıgizetin bolady.
Jıyndy qorytyndylaǵan ákim orynbasary jobalardy júzege asyrý barysynda kedergilerge tap bolǵan nemese bızneske qatysty saýaldary bar kásipkerlermen ashyq dıalog jasaýǵa daıyn ekenin aıtty.
