Túrkistan oblysynda karantınnen qashyp ketken turǵynnyń ústinen qylmystyq is qozǵaldy
TÚRKІSTAN. QazAqparat - Túrkistan oblysynda karantınnen qashyp ketken turǵynǵa qatysty qylmystyq is qozǵaldy. Ol 10 naýryz kúni Reseıdiń Máskeý qalasynan Almatyǵa ushyp kelgen, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, osy reıstiń jolaýshylarynyń birinde koronavırýstyń anyqtalýyna baılanysty azamattar karantınge jatqyzylǵan. Solardyń biri – Shymkent qalasynyń turǵyny Qazyǵurt aýdandyq juqpaly aýrýlar aýrýhanasyna 14 kúnge karantınge jiberilgen. Alaıda er adam aýrýhanadan qashyp ketken. Polıtseılerdiń jedel-izdestirý is-sharalarynyń nátıjesinde, er adam Arys qalasyndaǵy ata-anasynyń úıinen ustaldy. Ol jedel járdem dárigerlerimen birge Qazyǵurt aýdandyq juqpaly aýrýlar aýrýhanasyna qaıta jetkizildi.
«Belgili bolǵandaı, karantınnen qashqan er adam Vetnamda jumys istegen. Koronavırýstyń saldarynan Almaty qalasyna Máskeý arqyly tranzıtpen ushyp kelgen. Bul jaıt QR QK-niń 304-baby «Sanıtarııalyq qaǵıdalardy nemese gıgıenalyq normatıvterdi buzý« boıynsha SDTBT-ǵa tirkeldi. Búgingi tańda polıtsııa qyzmetkerleri istiń tolyq mán-jaıyn anyqtaýda», - delingen habarlamada.
Eske salaıyq, elimizde koronavırýske qatysty karantınnen qashqan azammattardyń ústinen 2 is qozǵalyp otyr. Birinshi jaıt Almaty qalasynda tirkelgen bolatyn.
