Túrkistan oblysynda karantındik shekteý týraly qaýlyǵa ózgeris engizildi

TÚRKІSTAN. QazAqparat – «Túrkistan oblysynyń aýmaǵynda karantın men shekteý sharalaryn uzartý týraly» óńirdiń Bas memlekettik sanıtarlyq dárigeriniń 2021 jylǵy 14 sáýirdegi qaýlysyna birqatar ózgeris engizildi , dep habarlaıdy QazAqparat tilshisi.

Jańa qujatqa sáıkes, mal bazarlary sanıtarııalyq-dezınfektsııalyq rejımdi saqtaı otyryp, qalypty rejımde jumys jasaıtyn boldy.

Sondaı-aq, jańa qaýlyda «Ashyq» jobasyna qatysatyn sýbektiler qyzmetin «Kásipkerlik obektilerde «Ashyq» mobıldi qosymshasyn engizý týraly» jáne «Qazaqstan Respýblıkasynyń Bas memlekettik sanıtarııalyq dárigeriniń 2021 jylǵy 3 maýsymdaǵy № 26 qaýlysyna ózgerister men tolyqtyrýlar engizý týraly» qaýlylaryna sáıkes atqarý mindettelgen. Atalǵan qaýlyny menshik nysanyna qaramastan barlyq jeke jáne zańdy tulǵalardyń oryndaýy talap etiledi.

Budan bólek, aýdan jáne qala ákimderi men oblystyq Polıtsııa departamentiniń bastyǵyna, aýdandyq jáne qalalyq sanıtarııalyq-epıdemıologııalyq baqylaý basqarmalarynyń basshylaryna osy qaýlynyń oryndalýyna baqylaýdy qamtamasyz etý tapsyrylǵan.