Túrkistan oblysynda karantın talaptaryn buzýdyń 150 faktisi anyqtaldy
TÚRKІSTAN. QazAqparat – Túrkistan oblysynda karantın talaptary 150 ret buzylǵan, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
Baspasóz málimetterine qaraǵanda, 2020 jyldyń jeltoqsan aıynyń 28-i men 2021 jyldyń qańtar aıynyń 3-i aralyǵynda koronavırýs indetiniń órship, karantın talaptarynyń saqtalýyna tekserý júrgizildi. Іs-shara barysynda oblysta QR ÁQBtK-niń 425-baby boıynsha 144 quqyqbuzýshylyq jasalǵany anyqtaldy. Onyń ishinde 19-y oblys ortalyǵy Túrkistan qalasyna tıesili.
Mobıldi top ókilderi Túrkistan qalasy T.Nyshanov kóshesi boıynda ornalasqan úlken saýda oryndarynyń birinde kelýshiler arasynda araqashyqtyq saqtalmaǵanyn, satýshylardyń medıtsınalyq qolǵapsyz jumys atqaryp jatqanyn anyqtady. Odan bólek, Túrkistan qalasyndaǵy kompıýterlik oıynhanalardyń biri karantındik shekteýlerge qaramastan oıynhananyń jumys istegenin jáne ıesiniń ózi medıtsınalyq betperdesiz júrgenin anyqtady. Al osy oıynhanaǵa kelgen eki turǵyn betperde taqpaı júrgen.
«Qazirgi karantın talaptaryn buzǵan turǵyndarǵa qatysty QR ÁQBtK-niń 425-baby «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normalardy buzý» boıynsha ákimshilik hattama toltyryldy. Jınalǵan materıaldar zańdy sheshim qabyldaý úshin tıisti organǵa (SES-ke) jiberildi.
Sondaı-aq polıtseıler toıhanalar men meıramhana, kafe-barlardy tekserip, nysan ıelerimen kezdesip, toı-jıyn ótkizbeý jáne azamattardyń jınalýyna jol bermeý kerektigin túsindirip, karantın talaptary buzylǵan jaǵdaıda zańdy shara qoldanylatyny týraly eskertti»,-delingen habarlamada.
