Túrkistan oblysynda karantın rejımin buzǵan 93 turǵyn qamaýǵa alyndy
TÚRKІSTAN. QazAqparat – Túrkistan oblysynyń polıtseıleri tótenshe jaǵdaı kezinde kúsheıtilgen rejımde qyzmet atqarýda. Osy ýaqyt aralyǵynda tártipke baǵynbaı, zańǵa qaıshy óreskel áreket jasaýshylarǵa qatysty 693 ákimshilik is qozǵalǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, óńirde tótenshe jaǵdaı rejımin buzǵany úshin 206 turǵynǵa 5,5 mln teńgege jýyq ákimshilik aıyppul salynǵan. Sondaı-aq, 226 tártip buzýshyǵa eskertý berilip, 93 azamat ákimshilik qamaýǵa alynǵan. Qazirgi tańda ákimshilik sotta 168 azamattyń is qaralý ústinde. Máselen, quqyqbuzýshylyq jasaǵan azamattardyń biri Túrkistan qalasyndaǵy ashanalardyń birinde azamattardy tamaqtandyryp kelgen. Al, Ordabasy aýdanyna qarasty Shubarsý eldi mekeninde ornalasqan avtokólik jýý orny da qyzmet kórsetip turǵany anyqtalǵan.
«Atalǵan jaıtqa sáıkes avtokólik jýý ornynyń ıesine qatysty QR Ákimshilik quqyq buzýshylyq týraly kodeksiniń 476-baby ıaǵnı «Tótenshe jaǵdaı rejımin buzý» boıynsha hattama toltyrylyp, sot qaraýyna joldandy», delingen habarlamada.
