Túrkistan oblysynda karantın rejımi jaǵdaı turaqtanǵansha jalǵasady
NUR-SULTAN. QazAqparat - Túrkistan oblysynda ınfektsııalyq aýrýlardy juqtyrǵan naýqastar sany azaımaı tur. Sondyqtan óńirde karantın rejımi jaǵdaı turaqtanǵansha jalǵasady. Bul týraly Óńirlik kommýnıkatsııalar qyzmetinde ótken brıfıngte Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Aldarqul Ahmetov málimdedi.
Oblysta bazarlardyń jumys rejımi dúısenbi-juma kúnderi saǵat 10.00-den 16.00-ge deıin, al qoǵamdyq tamaqtaný nysandarynyń (50 orynǵa deıin) jumysy dúısenbi-juma kúnderi saǵat 10.00-den 21.00-ge deıin shektelgen. Bul nysandarǵa senbi-jeksenbi kúni jumys isteýge tyıym salynyp otyr.
«Sulýlyq salondarynyń, shashtarazdardyń jumys ýaqyty tańǵy 10.00-den keshki 20.00-ge deıin shekteldi. Qonaq úıler men sanatorııalardy qospaǵanda, halyqqa qyzmet kórsetý salasyndaǵy týrızm obektileri men uıymdarynyń (demalys úıleri, týrıstik bazalar, basseınder, jaǵajaılar) qyzmetine, mektepke deıingi uıymdardaǵy kezekshi toptardyń jumysyna, bilim berý ortalyqtarynyń, úıirmeler men balalar túzetý kabınetteriniń jumysyna tyıym salyndy. Qala ishindegi qoǵamdyq kóliktiń jumysy sanıtarlyq-dezınfektsııalyq rejımdi kúsheıte otyryp, jumys kúnderi tańǵy saǵat 06.00-den 10.00-ge deıin jáne keshki saǵat 17.00-den 21.00-ge deıin shekteldi. Al senbi-jeksenbi kúnderi qoǵamdyq kólikterdiń jumysy toqtatylady», - dedi Aldarqul Raıymqululy.
Sonymen qatar, jumys kúnderi sýpermarketter men mınımarketter jáne úıdiń janyndaǵy dúkender saǵat 10.00-den 20.00-ge deıin, demalys kúnderi saǵat 10.00-den 18.00-ge deıin qyzmet kórsetýi tıis. Saýda salasynda sonyń ishinde pisken taǵamdardy, fastfýd, balmuzdaq, sýsyn satatyn dúńgirshikter tek jumys kúnderi ýaqyt shekteýimen (dúısenbi-juma) saǵat 10.00-den 18.00-ge deıin qyzmet kórsetetin bolady.
Menshik nysanyna qaramastan barlyq uıymdarda adam kóp jınalatyn jınalystar, keńester, konferentsııalar, forýmdar, semınarlar jáne basqa da is-sharalardy ótkizýge tyıym salyndy.
