Túrkistan oblysynda karantın rejımi jaǵdaı turaqtanǵanǵa deıin jalǵasady
TÚRKІSTAN. QazAqparat – Túrkistan oblysynda karantın rejımi epıdemıologııalyq ahýal turaqtanǵan kezeńge deıin jalǵasady. Bul týraly búgin Óńirlik kommýnıkatsııalar qyzmetinde ótken brıfıngte oblystyń bas sanıtar-dárigeri Nurbek Nyshanov málimdedi, dep habarlaıdy QazAqparat tilshisi.
Nurbek Nyshanovtyń aıtýynsha, óńirde koronavırýsqa qatysty epıdemıologııalyq ahýal turaqtanýy úshin ósim 1 apta kóleminde 5%-dan aspaýy qajet.
«Eger ósim 2%-dan aspasa, qosymsha jeńildikter engizilýine negiz bolady. Al, ósim kórsetkishi tómendemegen jaǵdaıda, karantındik talaptar qaıta kúsheıtiledi. Qarapaıym saqtyq sharalaryna erekshe nazar aýdarý tıistigin turǵyndardyń esine salamyz. Atap aıtqanda, eki jáne odan kóp adamnyń birlesip serýendeýi kezinde betperde mindetti túrde taǵylýy, áleýmettik qashyqtyq (2 metrden kem emes) saqtalýy tıis», - dedi Nurbek Sadyqbekuly.
Oblystyń bas sanıtar dárigeri sondaı-aq, turǵyndarǵa qandaı nárselerge tıym salynǵanyn atap ótti.
«Otbasylyq is-sharalardy jáne oıyn-saýyq, sporttyq jáne basqa da buqaralyq is-sharalardy ótkizýge, saýda-oıyn-saýyq ortalyqtary janyndaǵy balalardyń oıyn alańdary men kınoteatrlardyń, teatrlar men kórmelerdiń, túngi klýbtar men batýt jáne fýdkorttardyń jumysyna, mal bazarlarynyń qyzmetine tıym salynǵan. Karantın rejımin jáne shekteý sharalaryn saqtamaǵan tulǵalarǵa QR zańnamasynda belgilengen talaptarǵa sáıkes, ákimshilik jaýapkershilikke tartý boıynsha shara qoldanylady»,- dedi Nurbek Nyshanov.
Aıta keteıik, búginde óńirde koronavırýs indetin juqtyrǵan 594 jaǵdaı tirkelgen. Aýyrǵandardyń 7- i qaıtys bolyp, 265 adam jazylyp shyqqan.
