Túrkistan oblysynda karantın rejımi engiziledi
TÚRKІSTAN OBLYSY. QazAqparat – Túrkistan obylysynda 19 sáýir saǵat 00:00-den bastap, karantın rejımi engiziledi. Bul týraly oblys ákiminiń orynbasary Sáken Qalqamanov Ahýal ortalyǵynda málimdeme jasady, dep habarlaıdy QazAqparat tilshisi.
Sáken Qalqamanovtyń aıtýynsha, óńirde COVID-19 ınfektsııasyn juqtyrǵandar sany 50-den asqan. Sondyqtan azamattardyń ómiri men densaýlyǵyn qorǵaý, halyq arasynda koronavırýstyq ınfektsııanyń keńinen taralýynyń aldyn alý maqsatynda karantın rejımi engiziledi.
«Atap aıtqanda, kórshi aımaqtarmen shekaradaǵy sanıtarlyq blok-beketter jumysy kúsheıtiledi. Turǵyndarǵa qalaaralyq, aýdanaralyq jáne eldimekender arasynda qatynaýǵa shekteý qoıylyp, eldimeken ishindegi qoǵamdyq kólikter men jeke tasymal qyzmetiniń jumysy toqtatylady. Sanıtarlyq-epıdemıologııalyq jaǵdaıdyń turaqtylyǵy úshin qoǵamdyq oryndar men demalys oryndary, saıabaqtar jabylady. Azyq-túlik jáne kıim keshek bazarlary, turmystyq zattar satatyn bazarlar jumysy toqtatylady. Sondaı-aq, áli kúnge alańsyz esik aldynda oınap júrgen balalardyń oıyn alańdarynda, kóp qabatty úılerdiń aýlalarynda oınaýǵa tyıym salynady. Turǵylyqty jerde otbasylyq merekeler, týǵan kún, toı-jıyn ótkizýge shekteý qoıylady. Úsh adamnan artyq toptyń kóshede jáne qoǵamdyq oryndarda jınalýyna tyıym salynady. Jasy 65 jastan asqan azamattar úıden shyqpaı, oqshaýlanýy tıis. Turǵyndarǵa tek qajetti azyq-túlik, dári-dármek alýǵa úıge jaqyn jerdegi dúkender men dárihanalarǵa barýyna ruqsat. Azyq-túlik dúkenderiniń jumysy saǵat tańǵy 9 ben keshki 8 aralyǵynda shekteledi»,- dedi oblys ákiminiń orynbasary.
Sáken Qalqamanov sondaı-aq, halyqtyń tirshiligin qamtamasyz etý úshin qajetti azyq-túlik, zattar men ónerkásip, qurylys nysandaryndaǵy jáne kóktemgi egis jumystaryna qajet óndiristik taýarlar men materıaldar, medıtsınalyq zattar tasýǵa ruqsat qaǵazy bar avtokólikter men azamattar jáne medıtsınalyq kómek qajet bolǵan azamattar ǵana oblys aýmaǵyna kirip-shyǵa alatynyn jetkizdi. Atap óterligi, aımaqta qurylys salasy, kóktemgi egis naýqany, jumyspen qamtý jol kartasy, tirshilikti qamtamasyz etý nysandary karantındik rejımge qaramastan jumysyn toqtatpaıdy.
