Túrkistan oblysynda karantın rejımi 25 mamyrǵa deıin sozylady
TÚRKІSTAN. QazAqparat - Túrkistan oblysynda karantın rejımi 25 mamyrǵa deıin uzartyldy. Bul rette birqatar shekteýler saqtalady. Bul týraly Túrkistan oblysy ákiminiń orynbasary Sáken Qalqamanov onlaın brıfıngte málim etti, dep habarlaıdy QazAqparat oblystyq óńirlik kommýnıkatsııa qyzmetine silteme jasap.
Atap aıtqanda, kórshi aımaqtarmen shekaradaǵy sanıtarlyq blokposttar jumysyn jalǵastyrady. Turǵyndarǵa qalaaralyq, aýdanaralyq jáne eldimekender arasynda qatynaýǵa qoıylǵan shekteý kúshinde qalady.
Qoǵamdyq oryndar men demalys oryndary, saıabaqtar jumysyn bastaıdy.
Atalǵan sharalar Túrkistan oblysy Bas memlekettik sanıtarııalyq dárigeriniń 2020 jylǵy 10 mamyrdaǵy N17 Qaýlysymen bekitildi. Qaýlyǵa sáıkes, karantın rejımi aıaqtalǵansha eldimeken ishindegi qoǵamdyq kólikter men dinı baǵyttaǵy nysandar jumysyn bastamaıdy.
Sporttyq, mádenı is-sharalar ótkizilmeıdi. Azyq-túlik bazarlarynyń jumysy tańǵy saǵat 10.00 men keshki 17.00 arasynda jalǵassa, kıim-keshek, ózge de zattar satatyn dúkender dezınfektsııa jumystaryn kúsheıtilgen rejımde júrgize otyryp, tańǵy 9.00-20.00 aralyǵynda jumys isteıdi.
Balabaqshalarda kezekshi toptar óz jumysyn bastaıdy. Alaıda, munda tek aýrýhanadan anyqtamasy bar tárbıeshiler ǵana jumys isteýi tıis. Búldirshinderdiń densaýlyǵyna qatysty anyqtama talap etiledi.
Adam kóp jınalýyna jol berilmeıtin sán salondary, tigin tsehy, aıaq kıim jóndeý oryndary, shashtaraz, tis emdeý, em jasaý oryndary sekildi shaǵyn kásipkerlik nysandary da aldyn-ala jazylý tásilimen jumysyn bastaı alady.
Memlekettik mekeme qyzmetkerleriniń 50 paıyzy jumysty qashyqtan jalǵastyrady.
Úıden shyǵýǵa, serýendeýge tek maska taǵyp, ara qashyqtyqty saqtaǵan jaǵdaıda ruqsat etiledi.
Turǵylyqty jerde otbasylyq merekeler, týǵan kún, toı-jıyn ótkizýge, úsh adamnan artyq toptyń kóshede jáne qoǵamdyq oryndarda jınalýyna salynǵan tyıym kúshinde qalady. Jasy 65 jastan asqan azamattardy oqshaýlaý jalǵasady.
Halyqqa qyzmet kórsetý qyzmeti ortalyǵy men ekinshi deńgeıli bankter, «Qazposhta» bólimsheleri qazirgi tańda jumysyn bastady. Demalys oryndary, qonaq úıler, týrıstik nysandarǵa sanıtarlyq talaptardy saqtaǵan jaǵdaıda jumysyn bastaýǵa ruqsat etiledi.
Halyqtyń tirshiligin qamtamasyz etý úshin qajetti azyq-túlik, zattar men ónerkásip, qurylys nysandaryndaǵy jáne kóktemgi egis jumystaryna qajet óndiristik taýarlar men materıaldar, medıtsınalyq zattar tasýǵa ruqsat qaǵazy bar avtokólikter men azamattar jáne medıtsınalyq kómek qajet bolǵan azamattar ǵana oblys aýmaǵyna kirip-shyǵa alady.
