Túrkistan oblysynda karantın kezinde toı jasaǵan 7 toıhana jabyldy

TÚRKІSTAN. QazAqparat - Túrkistan oblysynda karantın talaptarynyń saqtalýyn qadaǵalaý maqsatynda mobıldi toptar qurylǵan. Olardyń jalpy sany - 104, dep habarlaıdy QazAqparat.

Jyl basynan beri mobıldi top quramy men polıtsııa qyzmetkerleri 87730 nysandy aralap, 1745-nen karantın talaptaryn buzǵany anyqtalǵan.

Talapqa baǵynbaǵan 7 toıhana men 1 kompıýterlik klýbtyń jumysyn ýaqytsha toqtatý boıynsha sot sheshimi shyqty.

Bul týraly brıfıngte oblystyq sanıtarııalyq-epıdemıologııalyq baqylaý departamenti basshysynyń orynbasary Asqar Ysqaqov málimdedi.

«Karantın talaptaryn saqtamaǵandardyń qatarynda jeke kásipkerler sany - 46, zańdy tulǵalar - 2, laýazymdy tulǵalar - 26, jeke tulǵalar - 1671. Tyıym salynǵan 235 merekelik is-shara tirkeldi. Sondaı-aq, 51 kókpar uıymdastyrylǵany belgili boldy. Budan bólek, kópshilik orynda betperde taqpaý, qoǵamdyq tamaqtaný oryndarynyń jumys rejımin saqtamaýy syndy derekter tirkelýde. Máselen, bir kúnniń ishinde Saıram, Saryaǵash, Maqtaral, Otyrar, Ordabasy, Qazyǵurt aýdandarynda 7 otbasylyq mereke uıymdastyrylǵan. Jalpy nátıjesinde QR Ákimshilik quqyq buzý kodeksiniń 425 babynyń 1-bóligi boıynsha 98 580 015 teńge aıyppul salyndy. Sondyqtan barsha oblys turǵyndaryn karantın talaptaryn saqtaýǵa shaqyramyz», - dedi Asqar Bekbolatuly.

Oblystyń bas memlekettik sanıtarııa dárigeri kásipkerlerdiń jumysyna jeńildik jasap, turǵyndar úshin tamaqtaný oryndarynyń jumys rejımin 9:00-23:00-ge deıin uzartý týraly qaýly shyǵarǵan bolatyn.

Degenmen, qaýlyda kórsetilgen ýaqyt rejımin saqtamaǵan 75 qoǵamdyq tamaqtaný oryndary anyqtalǵan.