Túrkistan oblysynda karantın kezinde toı ótkizýshiler kóbeıgen
TÚRKІSTAN. QazAqparat – Túrkistan oblysynda koronavırýsty ınfektsııanyń aldyn alý maqsatynda demalys kúnderi monıtorıngileý jumystary júrgizildi.
Mobıldi toptarmen júrgizilgen kúndizgi jáne túngi reıd jumystarynyń nátıjesinde 1328 nysan tekserilip, karantın talaptaryn buzǵan 206 nysan anyqtaldy, dep habarlaıdy QazAqparat tilshisi.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, zańbuzýshylyqqa jol bergen 158 jeke tulǵaǵa 30 AEK kóleminde aıyppul salynǵan. 25 jeke kásipkerge hattama toltyrylyp, olarǵa da 230 AEK kóleminde aıyppul tóleý mindettelgen.
Reıd barysynda sondaı-aq, tyıym salynǵan otbasylyq merekelik is-sharalar anyqtalyp, toqtatylǵan. Máselen, Qazyǵurt aýdanyna qarasty Turbat eldi mekenniń jergilikti turǵyny 32 qonaqty shaqyryp «qyz uzatý» toıynyń ótkizgen. Tólebı aýdanynda da Zaǵambar eldimekeniń turǵyny 50-den asa azamatty jınap, «qyz uzatý» toıyn jasaǵan. Arys aýdanynda 35-40 adamnyń basyn qosyp, 3-betashar men 1-qyz uzatý rásimderi ótkizilgeni anyqtalǵan. Al, Keles aýdanynyń Jolbasshy eldimekeniniń turǵyny 30 qonaqqa betashar ótkizip jatqan. Olardy da mobıldik top anyqtap, barlyq otbasylyq is-sharalar toqtatylǵan. Toı ıelerine ákimshilik quqyq buzýshylyq týraly hattama toltyrylyp, 30 AEK kóleminde aıppul salynǵan. Sonymen qatar Tólebı aýdanynda 4 demalys oryndary jumys istep jatqany belgili boldy. Barlyǵynyń jumysy toqtatylǵan. Ondaǵy kásipkerlerge de 230 AEK kóleminde aıyppul salynǵan.
