Túrkistan oblysynda karantın kezinde 600-ge jýyq toı toqtatylǵan
Bul jóninde oblystyń bas memlekettik sanıtarııa dárigeriniń orynbasary Aıdarqul Ahmetov óńirlik kommýnıkatsııalar qyzmetinde ótken brıfıngte málimdedi.
Atap aıtqanda, monıtorıng jumysynyń nátıjesi boıynsha 42 594 nysan tekserilip, 5137 aıyppul salynǵan.
Onyń ishinde 30 AEK kóleminde 4960 jeke tulǵaǵa (206 683 200 tg), 103 jeke kásipkerge (32 905 410 tg), 12 zańdy tulǵaǵa (3 833 640 tg), 62 laýazymdy tulǵaǵa (19 807 140 tg) hattamalar toltyrylǵan.
Ákimshilik quqyq buzý kodeksine sáıkes, eger 7 kún ishinde aıyppuldy óteıtin bolsa, 50 paıyzy ǵana tólenedi.
«Túrkistan oblysynda búgingi kúnge deıin jalpy 577 otbasylyq is-shara toqtatylyp, ákimshilik aıyppul salynǵan. Sondaı-aq, saılaýaldy kópshilik is-sharalaryn júrgizýde úgit-nasıhat ótkizý kezinde qaýipsizdik sharalary saqtalýy lázim. Ózińiz ben jaqyndaryńyzdyń densaýlyǵyna kóńil bólgenińiz abzal. Sondyqtan, saqtyq sharalaryn eskerýsiz qaldyrýǵa bolmaıdy»,-dedi Aıdarqul Raıymqululy.
Baspasóz máslıhatynda spıker saılaýaldy úgit is-sharalaryn teledıdar, radıo, baspa basylymdaryn, ınternet-resýrstardy paıdalana otyryp, onlaın rejımde ótkizý qajettigin aıtty.
Saılaý kampanııasy úshin arnaıy daıyndalǵan tegin baspa materıaldaryn, onyń ishinde ıllıýstratsııalyq materıaldardy, belgishelerdi, jalaýsha taratýda bir ret qoldanylatyn qolǵaptardy jáne qorǵanysh maskalaryn paıdalana otyryp júzege asyrý qajet.
