Túrkistan oblysynda qar qursaýynda qalyp qoıǵan 35 jolaýshy qutqaryldy
TÚRKІSTAN. QazAqparat – Túrkistan oblysynda qar qursaýynda qalyp qoıǵan 35 jolaýshy qutqaryldy. Barlyǵy Kentaý qalasyna qarasty Aşysaı aýylyna jetkizilgen, dep habarlaıdy QazAqparat tilshisi
Oblystyq TJD málimetinshe, óńirdiń taýly aýdandarynda aýa raıynyń qolaısyzdyǵy oryn alǵan. Burqasyn jel men boran bolyp, kóktaıǵaqtan kólikterdiń qozǵalýy qıyndaǵan. Saldarynan keshe, 27 qańtar kúni saǵat 22:30-da «Jambyl-Qumkent-Sholaqqorǵan» tas jolynyń ýchaskesinde qozǵalys toqtatylyp, jol jabylǵan. Alaıda artynsha tas joldyń 80 shaqyrymynda, Kentaý qalasyna qarasty Aşysaı aýylynda birqatar kólikterdiń turyp qalǵany belgili bolǵan. Oqıǵa ornyna TJD 11 qyzmetkeri men 2 tehnıkasy, ákimdik pen polıtsııanyń qyzmetkerleri, jergilikti turǵyndar baryp, qarǵa maltyqqan avtokólikterdi shyǵaryp aldy. Qutqarylǵan jolaýshylardyń arasynda 10 bala bolǵan.
«Avtojoldyń tazalanǵan bóligine 6 jeńil jáne 1 GAZel júk kóligi súırep shyǵaryldy. Ondaǵy júrgizýshiler men jolaýshylar Aşysaı aýylynyń turǵyndary ekeni anyqtaldy. Olardyń jaǵdaıy oıdaǵydaı bolǵandyqtan, medıtsınalyq kómek qajet bolmady», delingen habarlamada.
Eske salaıyq, keshe ońtústik óńirinde boran bolyp, qar jaýǵandyqtan birqatar joldar jabylyp qaldy. Túlkibas aýdanynan Jambyl oblysy baǵytyndaǵy Almaty – Termez – Tashkent tasjolynyń 594-634 shaqyrymynda aýa raıynyń qolaısyz bolýyna baılanysty qozǵalysqa shekteý qoıyldy. Sondaı-aq, Kóksáıek-Nysanbek-Taý samaly baǵytyndaǵy joldyń jáne Tólebı aýdanynan Qazyǵurt aýdanyna ótetin «Alǵabas» asýynyń jabylǵany habarlandy.
