Túrkistan oblysynda qar qursaýynan kólik jolaýshylary qutqaryldy
TÚRKІSTAN. QazAqparat - Túrkistan oblystyq Tótenshe jaǵdaılar departamentiniń qyzmetkerleri qar qursaýynan kólik jolaýshylaryn qutqaryp, dáriger men naýqasqa kómektesti, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, túngi saǵat 00:05 shamasynda qatty boran soǵyp, burqasyn jel turǵan. Saldarynan kóktaıǵaq bolyp, jol kórinbegen. Al, «Qoshqar ata – Jaryqbas – Birlik» tasjolynyń jabylýyna baılanysty kólik qozǵalysyna tyıym salynǵan. Soǵan qaramastan bir kóliktiń joldyń osy bóliginde turyp qalǵany anyqtalǵan. TJD-nyń 4 qutqarýshysy jol talǵamaıtyn «Trekol» kóligimen «Shaıan – Keńestóbe» trassasynyń 20-shy shaqyrymynda jolaýshylary bar avtokólikti joldyń tazartylǵan bóligine súırep shyǵarǵan. Sóıtip, 3 adam qutqarylyp, olar ary qaraı saparlaryn jalǵastyrǵan.
Túngi saǵat 02:40-ta qutqarýshylarǵa taǵy shaqyrtý túsken. Olar jol talǵamaıtyn kólikpen oblystyq aýrýhananyń dárigerine Aqtas aýylynda turatyn naýqasqa jetýge kómektesken.
«Medıtsınalyq kómek kórsetilgennen keıin qutqarýshylar dáriger men naýqasty jedel járdem kóligi kútip turǵan Birlik (70 km) aýylyna jetkizip tastaǵan. Zardap shekkender men qaıtys bolǵandar joq», - delingen habarlamada.
