Túrkistan oblysynda qandaı nysandar jumys isteı bastady

TÚRKІSTAN. QazAqparat – Túrkistan oblysynda maýsym aıynan bastap qala jáne aýylaralyq kólik qatynasy iske qosylyp, qoǵamdyq oryndar men nysandar óz jumysyn bastady. Bul týraly óńirlik kommýnıkatsııalar qyzmetinde ótken brıfıngte oblystyń bas sanıtar dárigeri Nurbek Nyshanov málimdedi, dep habarlaıdy QazAqparat tilshisi.

Oblystyń bas sanıtar dárigeriniń aıtýynsha, qoǵamdyq tamaqtaný oryndarynyń ashyq jazǵy alańdarynda saǵat 10.00-den 22.00-deıin 50 adamǵa deıin qabyldaýǵa ruqsat berilip otyr. Tek bul nysandardan sanıtarlyq-epıdemıologııalyq talaptardy saqtaý talap etiledi.

«Kúsheıtilgen sanıtarııalyq dezınfektsııalaý rejımin saqtaı otyryp, myna mekemeler óz jumysyn bastady: SPA ortalyqtar, monsha, basseınder, jaǵajaılar, halyqqa arnalǵan sport keshenderi, fıtnes ortalyqtar, sanatorıı-kýrorttyq mekemeler, demalys úıleri, kórermensiz mádenıet jáne sport mekemeleri, temir jol vokzaly men avtovokzaldar, avtostantsııalar, halyqqa qyzmet kórsetý jáne jumyspen qamtý ortalyqtary, ulttyq kompanııalar. Áleýmettik qashyqtyq pen maska rejımin saqtaı otyryp saıabaqta, alańdar men skverlerde, jaǵalaýda serýendeýge ruqsat berildi. Sondaı-aq, sanıtarlyq-dezınfektsııalyq rejımdi saqtaı otyryp, dinı nysandar da ǵımaratty 30%-ǵa deıin ǵana toltyryp, óz jumysyn bastaı alady», - dedi Nurbek Sadyqbekuly.

Aıta keteıeik, shtat kestesinde 30-dan astam qyzmetkeri bar árbir mekemege jumyskerlerdiń keminde 50 paıyzyn qashyqtan jumys istetý talap etiledi. Óz jumysyn qaıta bastaǵan nysandarda sanıtarlyq-dezınfektsııalyq jáne sanıtarlyq-karantın is-sharalarynyń saqtalýyna monıtorıng júrgizý jalǵasatyny da eskertildi.

Bastysy, oblys aýmaǵynda maska kııý rejımi saqtalyp otyr.