Túrkistan oblysynda «Qamqorlyq» jobasyn qoldaǵan kásipkerler qatary kóbeıdi
Áleýmettik áljýaz otbasylardy óz qamqorlyǵyna alýǵa daıyn azamattar kópke úlgi, ózgege ónege bolýy tıis. Oǵan kýá bolǵan oblys ákimi Ómirzaq Shókeev shalǵaı aýdandardy aralap, baspana taýqymetin tartqan birqatar otbasynda boldy. Kómekke muqtaj azamattardyń úıine baryp, jaı-kúıin surady.
Sonyń biri - shardaralyq Hatıcha Amansatova. 7 qyz, bir uldyń anasy jyldar boıy jaldamaly lashyqty panalap júr. Otaǵasy - múgedek. Úlken qyzy kolledjde oqıdy. Mártebeli meımandarǵa ýájin aıtqan kópbalaly ananyń bar armany - baspanaly bolý. Aımaq basshysy máseleni zerttep-zerdelep, sheshimin tabýdy jergilikti bılikke tapsyrdy. Sharalarda kómekke zárý 58 otbasy anyqtalǵan.
«Qazirgi qoǵam «ne alsam» emes, «ne bersem» deıtin adamdarǵa muqtaj. Barlyq aýdan, qalalarda osyndaı azamattardyń kóbeıgeni qýantady. Ózgege úlgi, mańaıyna qamqor kásipkerlerdiń áreketi kópke oı salary sózsiz»,- deıdi Ómirzaq Estaıuly.
Kásipker qoldaýymen taǵy bir otbasy jaqyn arada qonys toıyn toılaıtyn boldy. Keles aýdanynyń turǵyny Parıda Abdýllaeva jalǵyz balasymen eski, jupyny saraıda tirshilik etip júr. Atalǵan otbasynyń jaǵdaıyn kózben kórgen oblys ákimi Ómirzaq Shókeev otanasynyń jumyssyz ekenin eskerip, memlekettik baǵdarlama arqyly jumysqa ornalastyrýdy tapsyrdy.
Januıanyń jaǵdaıyna alańdaǵan jergilikti kásipker Nurlan Bazarbaev baspana salyp berýdi óz moınyna aldy.
«Osy jerdiń týmasy retinde árıne, janashyrlyq tanytamyn. Bul otbasymen tanystym. Jalǵyzbasty ana. Amaly bolmaǵan soń osyndaı jerde ómir súrýge májbúr. Qolymnan kelgen kómegimdi kórsetemin. Záýlim demeı-aq qoıaıyn, biraq boıjetken qyzymen turýyna yńǵaıly úı salyp berýge daıynmyn. Óz ortamda mundaı saýapty iske atsalysyp júrgen azamattar jeterlik»,-deıdi kásipker.
Jalpy, Keles aýdanynda kómekke muqtaj 178 otbasy anyqtalyp barlyǵyna jaýapty kýrator bekitilip, atalǵan azamattarǵa jan-jaqty kómek kórsetý mindettelgen. Oblys kóleminde kedeılik kebin kıgen jandarǵa kómek berip júrgen arqa súıer azamattardyń artqany qýantady.
Túrkistan oblysy ákiminiń baspasóz qyzmeti
