Túrkistan oblysynda «Qamqorlyq» baǵdarlamasy kómekke muqtaj jandarǵa demeý bolmaq
TÚRKІSTAN. QazAqparat – Túrkistan oblysynda qolǵa alynǵan «Qamqorlyq» baǵdarlamasy kómekke asa muqtaj jandarǵa demeý bolmaq. Bul týraly oblys ákimdiginde Ómirzaq Shókeevtiń tóraǵalyq etýimen ótken apparat jınalysynda aıtyldy, dep habarlaıdy QazAqparat tilshisi.
Jańa baǵdarlama oblys ákiminiń tapsyrmasyna sáıkes júzege asyrylýda. «Qamqorlyq» aımaqtyq baǵdarlamasy arqyly memleket tarapynan beriletin járdemaqy men kómekten bólek júzege asady. Turmys taýqymetin tartqan mundaı otbasylarǵa jan-jaqty qamqorlyq kórsetý arqyly, kedeılik sheńberinen shyǵýǵa múmkindik beredi. Olarmen aýdan, aýyl ákimderi tikeleı jumys júzgizetin bolady. Sonymen qatar, turmysta tarshylyq kórip júrgen jandarǵa jergilikti qazynadan eń tómengi kúnkóris deńgeıi mólsherindegi qarajat bólinip, ol otbasynyń eńbekke qaýqary bar músheleri jumysqa tartylady. Mundaı otbasylardy anyqtaý úshin arnaıy komıssııa qurylyp, onyń quramyna aýyl aqsaqaldary men jergilikti belsendiler de engizilmek. Atalǵan sharaǵa demeýshiler de atsalysady dep kútilýde. Jıynda oblys basshysy kómekke asa zárý jandardyń aıaqtan turyp ketýin baqylaýda ustap, ondaı otbasylardy jeke aralaıtynyn atap ótti.
Májilis barysynda sondaı-aq, «Pedagog mártebesi týraly» zań jobasy da qamtyldy. Óńirdiń bilim salasyndaǵy birqatar máseleler talqylanyp, 8 aýdanda daryndy balalarǵa arnalǵan mektep ashý máselesi aıtyldy. Bes kolledj «Jas maman» jobasyna enip, olardy negizgi qural-jabdyqtarmen qamtamasyz etýge respýblıkalyq bıýdjet esebinen 1,6 mlrd teńge qarjy bólingeni jetkizildi.
Al, 3 kolledj senimgerlik basqarýǵa beriletin boldy. Mektep oqýshylarynyń sany jyl saıyn 20 myńǵa artyp, birqatar aýdandarda jańa bilim uıasyn salý máselesi ózekti ekeni talqyǵa salyndy. Bilim uıalaryn kompıýtermen qamtamasyz etý jaǵy da sheshýdi talap etedi. Sondaı-aq, mektepterde qosymsha bilim berý maqsatynda sporttyq úıirmeler men oqýshylar saraılary ashylmaq. Aımaq basshysy barlyq aýdan ákimderine bilim salasyna kóńil bólip, mańyzdy máselelerdi sheshýdi tapsyrdy.
