Túrkistan oblysynda «Qamqorlyq» baǵdarlamasy qarqyn alyp keledi
Sonymen birge oblys ákimi Ómirzaq Shókeevtiń tapsyrmasymen «Qamqorlyq» baǵdarlamasy boıynsha áleýmettik jaǵdaıy tómen 4 otbasynyń shańyraǵyna kelip, turǵyndarmen kezdesti, dep habarlaıdy QazAqparat tilshisi.
Partııa músheleri turmysy tómen otbasylarǵa azyq-túlik pen qajetti zattar tapsyryp, oblys ákiminiń «Qamqorlyq» jobasy jaıly keńinen túsindirdi.
Aıta keteıik, jýyrda Túrkistan oblysynyń ákimi Ómirzaq Shókeev «Qamqorlyq» jobasyn jarııalaǵan bolatyn. Bul jobanyń maqsaty – turmys jaǵdaıy óte tómen otbasylardy túgel anyqtap, olarǵa júıeli kómek kórsetý bolmaq.
Joba boıynsha oblystyq bıýdjet, demeýshiler jáne qaıyrymdylyq qorlar arqyly kedeı otbasynyń árbir múshesine medıtsınalyq, jumysqa ornalasý, azyq-túlik pen turmystyq zattar áperý, bilim alý jáne ózge de máseleler boıynsha turaqty kómek kórsetilip, olardyń eńse tikteýlerine jaǵdaı jasalady. Óńir basshysy bul jobany júzege asyrýǵa partııa fılıaly da tikeleı atsalysatynyn aıtqan bolatyn. Turǵyndar bul bastamaǵa rızashylyqtaryn bildirip, sátti júzege asýyna tilektestik tanytty.
«Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaevtyń qoǵamdyq qabyldaýyna Qazyǵurt aýdanynan 8 turǵyn jazylǵan bolatyn. Solardyń biri B.Túkenov jer kezeginde turǵanymen áli kúnge deıin úıge qol jetkize almaı kele jatqanyn aıtyp, shaǵymdandy.
Qazyǵurt aýdanynda qazir 6671 adam jer kezeginde tur. Aýdanda 2013 jyldan beri jer berý toqtatylǵan. Endi aýdannyń bas jospary jasalyp, 200 gektar jerdi turǵyndarǵa berý máselesi qarastyrylyp jatyr. Osy derekterge toqtalǵan B.Dáýletuly ınfraqurylym tartylǵan soń jer kezekke saı beriletinin aıtty. Jalpy qabyldaý barysynda Qazyǵurt aýdanynda jer máselesi óte ózekti ekeni ańǵaryldy. Al S.Tashqaraev elektr baǵanalarynyń eskirgeni men elektr qýatynyń sapasy nashar ekenin aıtyp, másele kóterdi. Turǵynǵa búginde osy túıtkilge baılanysty tıisti jobalyq smetalyq qujat ázirlengenin, bul másele sheshimin tabatyny aıtyldy.
Sonymen birge qoǵamdyq qabyldaýda birneshe turǵyn ataýly áleýmettik kómek alý men kópbalaly otbasylarǵa beriletin járdemaqy boıynsha qujat retteý jónindegi aryzdaryn aıtty. Ásirese, G. Jumalıevanyń janaıqaıy ózekti bolyp otyr. Jeti balanyń anasy búginde kópbalaly otbasylarǵa beriletin járdemaqynyń ózin ala almaı júr. Kópbalaly ananyń shaǵymy nazarǵa alynyp, partııanyń bastamasymen jýyrda sheshimin tappaq. Al, Tólebı aýdanyndaǵy qoǵamdyq qabyldaýda turǵyndar baspana, áleýmettik kómek jáne mal urlyǵy boıynsha shaǵymdandy.
Olardyń birqataryn naqty sheshý boıynsha usynystar men tapsyrmalar berildi. Qoǵamdyq qabyldaý men áleýmettik jaǵdaıy tómen otbasylarmen kezdesýge Qazyǵurt jáne Tólebı aýdany ákimdikteriniń ókilderi, depýtattar men jergilikti partııa fılıalynyń birinshi orynbasarlary da qatysyp, «Qamqorlyq» jobasy boıynsha jumys isteýge daıyn ekenderin jetkizdi. Eki aýdan boıynsha qabyldaýǵa kelgen árbir turǵynnyń talaby zań aıasynda oryndalýy partııa fılıalynyń qadaǵalaýyna alyndy.
