Túrkistan oblysynda iz-túzsiz joǵalǵan er adamdy tanysy óltirip tastaǵany anyqtaldy
TÚRKІSTAN. QazAqparat – Túrkistan oblysynda er adam bergen qaryzyn suraý úshin baryp, kisi qolynan qaza boldy, dep habarlaıdy QazAqparat oblystyq PD baspasóz qyzmetine silteme jasap
Málimetke saı, Túrkistan oblysy Saıram aýdandyq polıtsııa basqarmasyna 14 naýryz kúni túngi saǵat 23:00 shamasynda jergilikti áıel adam kúıeýiniń iz-tússiz joǵalǵany týraly aıtyp, aryzdanady.
Saıramdyq saqshylar aryzdy birden tirkep, joǵalǵan azamatty izdestirýge kirisken. Jan-jaqqa baǵyttamalar berilip, aýdandyq polıtsııa basqarmasynyń jeke quramy jumyldyrylady. Aýdandaǵy taksı júrgizýshilerinen jáne kórýi múmkin degen turǵyndardan suraq-jaýaptar alynady.
Osyndaı atqarylǵan aýqymdy jumystardyń nátıjesinde aýdan polıtseıleri kúdiktiniń izine túsedi. Onyń túr-tulǵasyn anyqtap, joǵalǵan er azamattyń tanysy ekenin biledi. Kúdikti Saıram aýdanyndaǵy Qaramurt aýylynyń turǵyny bolyp shyqty. Ol óz kinásin moıyndamaı, jaýaptan jaltarýǵa tyrysady.
Alaıda polıtseıler dálelder men aıǵaqty zattardy jınaqtap, joǵalǵan azamat óziniń «BMV» kóligin tastap, tek osy kúdiktimen jolyqqanyn jáne kúdiktiniń kóligine otyryp ketkenin tolyǵymen dáleldep shyǵady. Osydan soń baryp, kúdikti óz kinásin tolyq moıyndaıdy.
Tekserý barysynda belgili bolǵandaı, joǵalǵan er azamat óziniń tanysyndaǵy iri kólemdegi aqshasyn alý úshin onymen jolyqqan. Kúdiktiniń kóligine otyryp, jolda ketip bara jatyp ekeýiniń arasynda daý janjal týyndaǵan. Nátıjesinde qaryzdy qaıtarǵysy kelmegen kúdikti óziniń tanysyn aıaýsyz qylqyndyryp, jer jastandyrǵan. Al máıitti óziniń burynǵy jumys isteıtin orny, karerdiń mańyna aýyr qylmysyn jasyrý maqsatynda kómip tastaǵan.
Kúdikti er azamat qamaýda. Ol buryn sotty bolmaǵan. Búginde oǵan qatysty QR QK-niń 99-babynyń 1-bóligimen «Adam óltirý» boıynsha sotqa deıingi tergep-tekserý jumystary júrgizilýde.
