Túrkistan oblysynda ıt tóbelesi kisi ólimimen aıaqtaldy
ShYMKENT. QazAqparat - Túrkistan oblysynda ıtterdiń tóbelesin tamashalaýǵa kelgenderdiń arasynda janjal shyǵyp, bir adam kóz jumdy. Bul týraly oblystyq Qylmystyq ister jónindegi mamandandyrylǵan aýdanaralyq sotynyń sýdıasy Ábdýáli Qosmuratov málimdedi , dep habarlaıdy QazAqparat tilshisi.
Aıta keteıik, túrkistandyq turǵyndardyń biri keshkisin óz úıinde ıt tóbelesin uıymdastyrǵan. Itterdiń tóbelesin tamashalaýǵa kelgenderdiń arasynda janjal shyǵyp, sońy kisi ólimimen aıaqtaldy. Eki turǵyn sol jerge kelgen bir jigitke jabylyp, soqqyǵa jyqqan. Taıaq jegen turǵyn da qarap turmaı olarǵa sýyq qarýdan oq atqan. Sonyń saldarynan oq jaraqatyn alǵan qala turǵyny jantásilim etti. Al, sýyq qarý qoldanǵan kúdikti sol kúni-aq qolǵa túsip, qamaýǵa alyndy.
Túrkistan oblystyq Qylmystyq ister jónindegi mamandandyrylǵan aýdanaralyq sotynyń sýdıasy Ábdýáli Qosmuratovtyń aıtýynsha, adam óltirdi dep kúdik keltirilip otyrǵan adamdy ýaqytsha tergeý abaqtysyna qamaý týraly sot sanktsııasy shyqqan.
«Kúdiktige Qylmystyq kodekstiń 99 babynyń 2 bóligi, 9 tarmaǵy («Adam óltirý») boıynsha is qozǵalyp, eki aıǵa qamaý týraly sot sanktsııasy berildi»,- dedi sýdıa.
Qazirgi tańda óńirdiń tártip saqshylary qylmystyq oqıǵanyń mán-jaıyn anyqtap, sotqa deıingi tergep-tekserý amaldaryn júrgizýde.
Osyǵan deıin Shymkentte balasyn uryp-soqqan áıel izdestirilip jatqandyǵy habarlandy.
