Túrkistan oblysynda iri qara mal basy 6,7 paıyzǵa artty
TÚRKІSTAN. QazAqparat - Qazaqstanda salynǵan jylyjaılardyń 77 paıyzy jáne tamshylatyp sýarý ádisiniń 73 paıyzy Túrkistan oblysyna tıesili. Óńirde jylyjaı kólemin arttyrý úshin qosymsha 86,7 gektar jylyjaı salynyp, oblystaǵy jalpy kólemi 1287,7 gektarǵa jetti. Bul týraly búgin Túrkistan oblystyq óńirlik kommýnıkatsııalar qyzmetinde ótken brıfıngte Aýyl sharýashylyǵy basqarmasynyń basshysy Serik Turbekov málim etti.
Sonymen qatar, tamshylatyp sýarý ádisi jańadan 6 223 gektar aýmaqqa endirilip, jalpy kólemi 64,2 myń gektarǵa jetti.
«Oblys boıynsha dándi daqyldardyń barlyq egis kólemi 280,9 myń gektardy qurap, mejeden 35,9 myń gektarǵa artty. Al maqtanyń egis kólemi 129,7 myń gektarǵa jetip, jospardan 24,7 myń gektarǵa ósip otyr. Búgingi tańda oblystaǵy barlyq baý kólemi - 21 600 gektar, onyń ishinde ıntensıvti baýlar - 2 800 gektar, júzim - 10 200 gektar, tańqýraı - 208 gektar, jańǵaq sharýashylyǵy - 350 gektardy quraıdy. Aǵymdaǵy jyly qosymsha ıntensıvti baýlar - 940 gektar, júzim - 570 gektar, jańǵaq 207 gektar alqapqa qosymsha egildi», - dedi Serik Turbekov.
2018 jyldyń 6 aıynyń qorytyndysy boıynsha óńirdegi iri qara maldyń sany - 6,7 paıyzǵa, qoı men eshki sany - 5,2 paıyzǵa, jylqy basy - 9,6 paıyzǵa, túıe - 6,7 paıyzǵa, qus sany - 13,8 paıyzǵa artqan. Sondaı-aq, oblysta esepti kezeńde 103,4 myń tonna et, 364,4 myń tonna sút, 95,1 mln dana jumyrtqa óndirilgen.
«Altyn asyq» baǵdarlamasymen 11 893 bas qoı satyp alynyp, jalpy analyq basqa shaqqandaǵy úlesi 5,1 paıyzdy quraǵan. «Qulan» baǵdarlamasy aıasynda 2059 bas jylqy alynyp otyr.
