Túrkistan oblysynda ınsýlt ortalyqtary men tomograftarǵa 1 mlrd teńge jumsaldy
TÚRKІSTAN. QazAqparat - Túrkistan oblysynda bir jylda 1 mlrd teńgege kompıýterlik tomograftar alynyp, Kentaý, Saıram, Saryaǵash aýdandarynda ınsýlt ortalyqtary ashyldy. Bul týraly oblystyq Densaýlyq saqtaý basqarmasynyń basshysy Muqan Egizbaev baspasóz máslıhatynda málim etti, dep habarlaıdy QazAqparat tilshisi.
2018 jyly atqarylǵan jumys barysyn baıandaǵan basqarma basshysy oblystaǵy qajetti kardıohırýrgııalyq tósek oryndarynyń sany 30-ǵa jetkenin atap ótti. Al, jol qartasy aıasynda qala-aýdandarda qosymsha 5 jedel járdem brıgadasy ashylyp, klınıkalyq dıagnostıkalyq zerthanalyq qyzmetter sapasy jaqsarǵanyn jetkizdi.
«Medıtsınalyq qural-jabdyqtar men buıymdardy, kadrlyq áleýetti utymdy paıdalaný úshin Leńgir jáne Kentaý qalalarynda emhanalar men aýrýhanalardyń zerthanalary ortalyqtandyryldy. Kompıýterlik robottalǵan neırohırýrgııalyq júıe ornatylyp, olar omyrtqada ornalasqan júıke júıesiniń aýrýlaryn emdeýge qoldanylýda. Qazaqstandaǵy alǵashqy Vıtılıgo ortalyǵy ashylyp, vıtılıgony jańa hırýrgııalyq ádispen emdeý engizildi. Statsıonarlardyń qabyldaý bólimshelerinde trıaj júıesi ornatyldy. Jedel medıtsınalyq kómek qyzmetinde «Kómek» avtomattandyrylǵan basqarý júıesi iske qosyldy. Barlyq mashınalar GPS navıgatsııamen qamtamasyz etilgen»,- dedi Muqan Egizbaev.
Aıta keteıik, búginde Túrkistan oblysynda 2 mıllıonǵa jýyq halyq turady. 30 aýrýhanalyq uıym, sanatorııler men jedel medıtsınalyq kómek stantsııalary jumys isteıdi.
