Túrkistan oblysynda ınklıýzıvti bilim berý ortalyǵy ashyldy
TÓLEBI. QazAqparat – Túrkistan oblysynyń Tólebı aýdanynda alǵash ret «Psıhologııalyq-pedagogıkalyq túzetý kabınetteri» ashyldy, dep habarlaıdy QazAqparat Túrkistan oblysy ákimdiginiń baspasóz qyzmetine silteme jasap.
Ortalyqtyń saltanatty ashylý rásimine oblys ákiminiń orynbasary Sáken Qalqamanov qatysty.
Onda erekshe balalar men olardyń otbasy úshin defektolog, psıholog, logoped, fızıoterapevt, massajıst, tıflopedagog sııaqty mamandar tegin kómek beredi. Ár ortalyqta erekshe bilim berýdi qajet etetin 300-den astam bala jınalǵan.
Túrkistan oblysy ákimdiginiń, «Dara» qaıyrymdylyq qory men «Baısat» JShS-niń qoldaýymen ashylǵan «Psıhologııalyq-pedagogıkalyq túzetý kabınetteriniń» jumysymen tanysqan oblys basshylyǵy mundaı ortalyqtardyń mańyzdylyǵyn erekshe atap ótti.
«Ár bala ártúrli qabiletimen erekshelenedi. Ár bala daryndy. Osy oraıda balanyń daryndalyǵyn ary qaraı damytý maqsatynda barlyq jaǵdaı jasalýy tıis. Daryndy balalarmen jumys isteıtin ustazdar olardyń janyn túsine bilgende nátıjesi de kóp kúttirmeıdi. Oqýshynyń ózindik tabıǵı qasıetteri men qabiletterin damytyp, oqytý úlken jumys. Aldaǵy ýaqytta mundaı erekshe balalarmen jumys isteıtin ortalyqtardy kóptep ashý josparda bar», – dedi ortalyq jumysymen tanysqan oblys ákiminiń orynbasary Sáken Qalqamanov.
Bul ortalyq múmkindigi shekteýli balalardyń adamgershilik, eńbeksúıgishtik qasıetterin qalyptastyryp, olardyń ómirge degen qushtarlyq sezimin oıatý, oı-óristeri men oılaý qabiletterin jetildirip, tolyqqandy azamat dárejesine jetkizý maqsatynda jumys jasaıdy. Mekeme zamanaýı úlgidegi arnaıy qurylǵylarmen tolyq jabdyqtalǵan. Qazirgi tańda Tólebı aýdanynda erekshe oqytýdy qajet etetin 1130 bala bar. Erekshe balalarmen jumys isteıtin ortalyqtar Túrkistan qalasy men Keles aýdandarynda da ashylǵan.
