Túrkistan oblysynda Indigo-24 Evolution qarjy pıramıdasynyń 12 ókili ustaldy
TÚRKІSTAN. QazAqparat - Túrkistan oblysynda turǵyndardy 1,5 mıllıardqa jýyq teńgege shyǵyndandyrǵan «Indigo-24 Evolution» qarjy pıramıdasynynyń 12 uıymdastyrýshysy ustalyp, qamaýǵa alyndy. Bul týraly Túrkistan oblystyq Polıtsııa departamentiniń baspasóz qyzmeti málim etti.
Baspasóz qyzmetiniń habarlaýynsha, bıylǵy jazda jedel-izdestirý is-sharalary barysynda Jetisaı aýdandyq polıtsııa bóliminiń qyzmetkerleri Jetisaı qalasyndaǵy «Indigo-24 Evolution» qarjy pıramıdasynyń qyzmetin toqtatqan bolatyn.
Bul jaıt QR QK-niń 217-baby 3-bóligi (Qarjylyq (ınvestıtsııalyq) pıramıdany qurý jáne oǵan basshylyq etý) boıynsha tirkeldi. Bir aı ótkennen soń jábirlenýshiler sany 300-den asty.
Osydan soń polıtsııa qyzmetkerleri osy iske qatysy bar basqa da kúdiktilerdi ustaý úshin, qajetti sharalardy qolǵa aldy. Kúdiktilerdiń túr-tulǵasyn anyqtap, izderine tústi. Jetisaı aýdandyq polıtsııa bólimine Shymkent qalasynan qarjy pıramıdasyn uıymdastyrdy degen kúdikpen Jetisaı aýdanynyń turǵyny, qarjy pıramıdasynyń dırektory jetkizildi. Sondaı-aq onyń eki sybaılasy, Maqtaaral aýdanynyń turǵyndary da ustaldy.
Tergeý barysynda keńsege tintý júrgizilip, qujattar, jabdyqtar, kompıýterler jáne basqa da aıǵaqty zattar tárkilendi. Atqarylǵan jumystardyń nátıjesinde alǵashynda 5 kúdikti, keıinnen 7 kúdikti ustaldy. Olar Jetisaı, Shardara, Maqtaaral, Saryaǵash aýdandary turǵyndarynyń kópshiligin aldap, alǵan aqshalaryn qaıtarmaǵan.
Búgingi tańda Túrkistan oblysy Polıtsııa departamentiniń bilikti degen tergeýshilerinen tergeý toby qurylyp, sotqa deıingi tergep-tekserý jumystary júrgizilýde.
Túrkistan oblysy Polıtsııa departamenti Tergeý basqarmasynyń bastyǵy, polıtsııa polkovnıgi Nurmahan Jalǵasovtyń aıtýynsha, «Indigo-24 Evolution» qarjy pıramıdasynyń negizi 2015 jyly Almaty qalasynda qalanǵan.
Onyń uıymdastyrýshysy retinde týys kúdiktiler ustaldy. Olardyń Túrkistan oblysynda birneshe turǵyndy dırektor retinde taǵaıyndap, oblys turǵyndarynan 1 mıllıon teńgeden aqshalaryn alyp, eselep qaıtaramyz degen qurǵaq ýádemen óz alaıaqtyq áreketterin iske asyrǵan. Búgingi tańda jábirlenýshiler sany 1500-den asty. Olardyń barlyǵynyń aryzdary zańdy túrde tirkelgen. Ustalǵan 12 kúdikti de sottyń sanktsııasymen qamaýǵa alyndy. Búgingi tańǵa deıingi belgili bolǵan shyǵyn kólemi 1 mıllıardtan astam teńgeni quraıdy. Sonymen qatar aryzdanýshylar men kúdiktiler sany artýy, soǵan sáıkes shyǵyn kólemi de ósýi múmkin», - deıdi polkovnık N.Jalǵasov.
«Belgili bolǵanyndaı, salymshylardyń basym bóligi kúdiktilerdiń sózine senip, aldanyp, salymdy nesıe arqyly salǵandar. Qazirgi ýaqytqa deıin anyqtalǵan salymshylar salǵan qarjy kólemi 1 mıllıon teńgeden 10 mıllıon teńgege deıin jetedi»,-delingen Polıtsııa departamentiniń baspasóz qyzmeti taratqan aqparatta.
