Túrkistan oblysynda HQKO qyzmetti brondaý arqyly kórsetýge kóshti

TÚRKІSTAN. QazAqparat – Túrkistan oblysynda qatań karantındik shekteý sharalaryn saqtaý maqsatynda HQKO qyzmetti aldyn ala brondaý arqyly kórsetýge kóshti. Ordabasy aýdandaǵy ortalyq osyndaı júıege kóshse, Saıram aýdanynda kelesi aptadan bastalmaq, dep habarlaıdy QazAqparat tilshisi.

Qyzmet kórsetýdiń osy formatyna sáıkes, azamattar qoljetimsiz «qaǵaz júzindegi» qyzmetter men egov.kz portalynda onlaın túrde rásimdelgen qyzmetterdiń nátıjelerin ala alady. Kezekti egov.kz portalyndaǵy arnaıy servıs arqyly, 1414 baılanys ortalyǵyna qońyraý shalyp nemese eGovKzBot2.0 Telegram botynyń kómegimen brondaýǵa bolady.

Túrkistan oblysyndaǵy halyqqa qyzmet kórsetý ortalyqtary saǵat 09.00-den 15.00-ge deıin jumys isteıdi. Qyzmet alý úshin kezekti saǵat 14.30-ǵa deıin brondaý qajet. Odan keıingi brondalǵan kezek jaramsyz dep sanalady.

Aıta keteıik, búginde halyq arasynda keń suranysqa ıe memlekettik qyzmetter onlaın túrde qoljetimdi bolyp otyr. «Azamattarǵa arnalǵan úkimet» memlekettik korporatsııasy» Túrkistan oblysyndaǵy fılıaly qyzmetterdi egov.kz portaly nemese mobıldi qosymshalar arqyly kórsetip, turǵyndardyń densaýlyǵyna janashyr bolýǵa úlesin qospaq.