Túrkistan oblysynda halyqtyń 98 paıyzynda elektrondy densaýlyq pasporty bar
TÚRKІSTAN. QazAqparat - Túrkistan oblysynda 1 791 201 elektrondyq densaýlyq pasporty jasaqtaldy. Bul óńir halqynyń 98 paıyzyn quraıdy, dep habarlaıdy QazAqparat. Bul týraly Túrkistan oblysynyń Óńirlik kommýnıkatsııalar qyzmetinde ótken brıfıngte Densaýlyq saqtaý basqarmasynyń basshysy Muqan Egizbaev málimdedi.
Onyń aıtýynsha, óńirdegi barlyq medıtsına qyzmetkeri aqparattyq júıe boıynsha oqytylyp, 290 668 azamat mobıldik qosymshany paıdalanǵan.
Sonymen qatar, elektrondyq medıtsınalyq jazbalar sany 1 701 891-ge jetip, eńbekke jaramsyzdyq paraǵy elektrondyq nusqada 52 563 adamǵa berilgen. Aýdandyq, qalalyq emhanalarda 20 tsıfrlyq kómek posttary ashylyp, onda 408 201 adam oqytyldy.
Basqarma basshysynyń aıtýynsha, oblystaǵy medıtsına uıymdarynyń jabdyqtalýy 65 paıyzdan asqan.
«Aǵymdaǵy jyly medıtsınalyq uıymdardyń materıaldyq-tehnıkalyq jabdyqtalýyna 8,1 mlrd teńge bólinip, ótken jylmen salystyrǵanda 1,5 esege artyp otyr. Birinshi kezekte ana men bala, jansaqtaý, ota jasaý, jedel járdem qyzmetin kúsheıtýge jáne «Tsıfrlyq Qazaqstan» baǵdarlamasyn iske asyrýǵa basymdyq berilip otyr. Budan ózge, Túrkistan qalalyq emhananyń jáne Túrkistan qalasyndaǵy 610 tósek orynǵa arnalǵan oblystyq kópsalaly aýrýhananyń, sondaı-aq oblystyq týberkýlezge qarsy jáne onkologııalyq ortalyqtardyń qurylysyn júrgizý, Túrkistan qalasynda oblystyq jedel járdem stansysyn jańǵyrtý jáne paıdalaný jobalary josparlanýda», - dedi Muqan Egizbaev.
2018 jyly oblysta 15 aýyldyq emhana men 5 dárigerlik ambýlatorııa 20 Bastapqy medıtsınalyq-sanıtarııalyq kómek (BMSK) bolyp qaıta qurylǵan. Sonymen qatar, Kentaý, Saıram, Saryaǵash aýdandarynda 3 ınsýlttik ortalyq ashylyp, oblystyq bıýdjet esebinen 3 dana kompıýterlik tomograf satyp alyndy.
