Túrkistan oblysynda halyqaralyq «Safari Shardara» festıvali ótti
ASTANA. QazAqparat - Shardara aýdany «Aqqala» demalys aımaǵynyń jaǵalaýynda alǵash ret «SAFARI SHARDARA» atty festıval ótti. Aıtýly sharada óńirdiń týrıstik áleýetin arttyrýǵa baǵyttalǵan kórme uıymdastyryldy, dep habarlaıdy oblystyq ákimdiktiń baspasóz qyzmeti.
Festıval balyq aýlaýshylar jarysymen bastaldy. Keıin halyqaralyq deńgeıdegi saıystarǵa ulasyp, bir sátte birneshe sport túrlerinen jarys ótti. Atap aıtqanda, qazaqsha kúres, jelkendi qaıyq, akademııalyq esý, jaǵajaı voleıboly men fýtboly, qol kúresi, gır kóterý, arqan tartý, bórenge órmeleý, qoshqar kóterý syndy jarystardan saıypqyrandar baq synady. Sondaı-aq, qonaqtar Shardara aýdanynyń tarıhymen, aýyl sharýashylyǵy ónimderi jáne ulttyq qolóner kórmesimen tanysty.
Odan soń shara sahnalyq kórinispen jalǵasyp, festıvaldiń bastalýynan habar beretin daýylpazdar dabyl qaqty. Shardara aýdanynyń ónerpazdary arnaıy merekelik «Safari Shardara» ánin oryndady. Keıin Túrkistan-Otyrar-Shardara baǵytynda júrip ótken motobaıkerler sahna alańynda MOTOKROSS ónerin kórsetip, jıylǵan qaýymdy tamsandyrdy.
Festıval sý aıdynyndaǵy qaıyqtardyń shoýymen jalǵasty. Onda saıysqa qatysqan 15 balyqshy qaıyqpen jaǵalaýǵa kelip, elimizdiń Týyn jelbiretti. Balyqshylardyń sońynan baıdarka esýshiler óner kórsetti. Keıin «Qazyna», «Shamsınýr» bı toptary jáne tsırk ónerpazdary horeografııalyq kompozıtsııa oryndady.
