Túrkistan oblysynda halyqaralyq «kaskasu» sýretshiler pleneri bastaldy
TÚRKІSTAN. QazAqparat - Túrkistan oblysynyń ákimi Janseıit Túımebaevtiń qoldaýymen Tólebı aýdanynda Halyqaralyq "KASKASU» sýretshiler pleneriniń ashylý saltanaty ótti, dep habarlaıdy óńir basshysynyń resmı saıty.
Igi sharanyń negizgi maqsaty - óńirdegi sáýlettik eskertkishterdi, tarıhı oryndar men tamasha tabıǵatty nasıhattaý. Sondaı-aq, Túrkistan óńiriniń ózindik tabıǵı geografııalyq erekshelikterin jáne kóztartarlyq oryndaryn beıneleıtin halyqaralyq deńgeıdegi óner shyǵarmalaryn jasap, olardy álemdik deńgeıde tanytý, sol arqyly týrızmdi damytýǵa úles qosý. Sonymen qatar, túrkitildes elderdiń óner qaıratkerleri men talantty qylqalam sheberleriniń ózara tájirıbe almasýyn júzege asyrý, tilegi ortaq túrki halyqtarynyń arasyndaǵy dostyq baılanysty nyǵaıtý bolyp tabylady.
27 shildege deıin jalǵasatyn plenerge Túrkııa, Reseı, Qyrǵyzstan, Ózbekstan, Ázerbaıjan elderi jáne Astana, Almaty, Oral, Aqtóbe, Atyraý, Pavlodar, Qaraǵandy, Taraz jáne Túrkistan óńirinen kásibı sýretshiler qatysýda. Sharanyń ashylý saltanaty sýretshiler qaýymynyń ishki dúnıesin tanytar teatrlandyrylǵan qoıylymmen bastaldy. Tórtkúl dúnıeden kelgen qylqalam sheberlerine Tólebı aýdanynyń ákimi Baýyrjan Omarbekov quttyqtaý sózin arnap, basqosý arnaıy baspasóz máslıhatymen jalǵasty.
Aldaǵy ýaqytta dúnıeniń túkpir-túkpirinen jınalǵan sýretshiler bes kún ishinde birneshe shyǵarmashylyq topqa bólinip, Túrkistan oblysyndaǵy mádenı-sáýlettik eskertkishter men tarıhı oryndardy jáne tabıǵı qoryqtary aralap, etıýdtik jumystar jasaıdy.
Plener aıasynda 27 shilde kúni «Taý samaly» demalys aımaǵynda kórme uıymdastyrylady. Sondaı-aq, jeńimpaz sýretshiler marapattalyp, gala-kontsert ótedi.
