Túrkistan oblysynda «Halyq zańgeri» jalpyrespýblıkalyq aktsııasy ótti
TÚRKІSTAN. QazAqparat – Túrkistan oblysynda «Halyq zańgeri» jalpy respýblıkalyq aktsııasy ótti. Halyqtyń quqyqtyq saýattylyǵy men mádenıetin kóterý maqsatynda uıymdastyrylǵan sharada turǵyndardyń túıitkildi máselelerine baılanysty tegin keńester berildi, dep habarlaıdy QazAqparat tilshisi.
Atalǵan shara Tólebı aýdanyndyq Halyqqa qyzmet kórsetý ortalyǵynda uıymdastyryldy. «Halyq zańgeri» aktsııasy aıasynda memlekettik organdardyń, «Nur Otan» partııasynyń, aýdandyq aýylsharýashylyǵy bólimniń, sáýlet, qala qurylysy, jer qatynastary bóliminiń, memlekettik kirister, kóshi-qon, ádilet basqarmasy, kásipkerlik, jumyspen qamtý bólimderiniń ókilderi jergilikti turǵyndarmen kezdesip, olardyń máselelerimen tanysty. Quqyqtyq turǵyda sheshý joldaryn aıtyp ótti. Aktsııaǵa kelgen turǵyndar jer telimderin tirkeý, turǵyn úı máselesi, kásipkerlikpen aınalysý, áleýmettik sala, eńbek, quqyq qorǵaý baǵyttary boıynsha, aýyl sharýashylyǵy salasy jáne ózderin mazalaǵan ózge de saýaldarǵa naqty jaýaptar aldy.
Dál osyndaı aktsııa Saryaǵash aýdanynda da ótti. Qazaqstan Respýblıkasy Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń uıymdastyrýymen ótken is-sharaǵa zańgerler, kásibı advokattar men notarıýstar, sot oryndaýshylary, medıatorlar, prokýrorlar, tergeýshiler, ádilet organdarynyń qyzmetkerleri, kóshi-qon polıtsııasy, jyljymaıtyn múlikti tirkeý bóliminiń ókilderi, memlekettik organdardyń qyzmetshileri, onyń ishinde bilim, densaýlyq, áleýmettik sala, jumyspen qamtý, aýyl sharýashylyǵy, jer salalary boıynsha bilikti de tájirıbeli mamandar qatysty. Aktsııa barysynda aýdan turǵyndary kóbinese áleýmettik máseleler boıynsha, quqyq qorǵaý organdarynyń protsessýaldyq is-áreketteri, jer qatynastary, kásipkerlikke oqytý, aýyl sharýashylyǵy salasyndaǵy sýbsıdııalaý suraqtarymen júgindi. Olar zań aıasynda qanaǵattanarlyq jaýaptar men paıdaly keńester aldy.
