Túrkistan oblysynda halyq tyǵyz ornalasqan aýdanda ınsýlt ortalyǵy ashyldy
ShYMKENT. QazAqparat - Túrkistan oblysynda halyq tyǵyz ornalasqan aýdanda ınsýlt ortalyǵy ashyldy. Saıram aýdanyndaǵy ortalyq aýrýhanada jumys isteı bastaǵan kompıýterlik-tomografııa kabınetinde sońǵy úlgidegi qondyrǵy ornatyldy, dep habarlaıdy QazAqparat tilshisi.
206 myńnan astam halqy bar Saıram aýdany úshin bul úlken jańalyq bolyp otyr. Emdeý mekemesine ornatylǵan apparattyń quny - 365 mln teńge. Oǵan qajetti qarajat oblystyq qazynadan bólingen.
Saıramdyqtardyń qýanyshyn bólisýge oblys ákiminiń orynbasary Erbol Tasjúrekov, oblystyq Densaýlyq saqtaý basqarmasynyń basshysy Muqan Egizbaev jáne medıtsına salasynyń ardagerleri keldi. Aýrýhana bazasynda ashylǵan ortalyq ınsýlt pen bas-mı jaraqatyn naqty anyqtaýǵa múmkindik beredi.
«Kompıýterlik-tomografııa aýrýdy alǵashqy belgilerinen-aq anyqtaýǵa múmkindik beredi. Apparattyń kómegimen bastaǵy isikter men qabyný protsesin, súıek qurylymyndaǵy aýrýlardyń aýyr jaǵdaıyn da naqty tabýǵa bolady. Sonymen qatar, keýdedegi, qursaq qýysy men asqazan, ash ishek, muryn qýysy men búırektegi aýytqýlardy tekserýge bolady»,- deıdi dárigerler.
Túrkistan oblystyq densaýlyq saqtaý basqarmasynyń basshysy Muqan Egizbaevtyń aıtýynsha, osyndaı ınsýlt ortalyqtary taǵy úsh aýdanda ashylady.
