Túrkistan oblysynda gazdan ýlaný faktileri azaıdy
TÚRKІSTAN. QazAqparat - Túrkistan oblysynda gazdan ýlaný jaǵdaılary tómendegen, dep habarlaıdy QazAqparat óńirlik kommýnıkatsııalar qyzmetine silteme jasap.
Máselen, 2018-2019 jylǵy jylytý maýsymynda 17 oqıǵa oryn alyp, ýly gazdan 23 adam qaıtys bolyp, 19 adam jaraqat alǵan.
Al 2019-2020 jylytý maýsymynda 7 oqıǵa oryn alyp, 5 adam ýlanyp qaıtys bolsa, 4 adam jaraqattanǵan.
Bul týraly óńirlik kommýnıkatsııalar qyzmetinde ótken brıfıngte Túrkistan oblysy boıynsha tótenshe jaǵdaılar departamentiniń bastyǵy Nurǵalı Júnisov málimdedi.
«Departament tarapynan gazdan ýlaný sebepterine turaqty monıtorıng júrgiziledi. Áleýmettik jelilerge baqylaý júrgizilip, qaýipsizdik talaptary saqtalmaǵan turǵyn úılerge eskertý jasalyp, jergilikti atqarýshy organnyń, «QazTransGazAımaq» pen «Ońtústikjaryq» ókilderiniń qatysýymen reıd júrgizilip turady. Atalǵan jumystar barlyq qala-aýdandarda qolǵa alynyp, arnaıy jumys toby osy baǵytta qarqyndy jumys atqarýda»,- dedi departament bastyǵy.
Búginde respýblıka kóleminde 15 qyrkúıekten bastap órt qaýipsizdigi aılyǵy júrip jatyr. Ol 15 qazanǵa deıin jalǵasady.
«Túrkistan oblysynda órt qaýipsizdigin aldyn alý jumystary maýsym jáne tamyz aılarynda júrdi. Úılerdi aralaý kezinde órt qaýipsizdik normalary men talaptaryn buza otyryp, paıdalanyp otyrǵan avtonomdy jylytý júıelerine, elektr symdarynyń aqaýyna basa nazar aýdarylyp, túsindirme jumystary júrgizildi. Búginge deıin oblys kóleminde 26 167 úıge reıd júrgizilip, 45 367 órt qaýipsizdigi talaptarynyń buzylýy anyqtalǵan. Sondaı-aq, departament tarapynan BAQ arqyly turǵyndarǵa eskertpeler, túsindirmeler aıtylyp keledi»,- deıdi Nurǵalı Syrlybaıuly.
