Túrkistan oblysynda ǵasyr jasaǵan aq jaýlyqty analarǵa syı-sııapat jasaldy
TÚRKІSTAN. QazAqparat – Ordabasy aýdanynda kóktem merekesi ǵasyr jasaǵan aq jaýlyqty analardy quttyqtaýmen bastaldy, dep habarlaıdy qazAqparat tilshisi.
Ordabasy aýdanynda 100 jastan asqan aq jaýlyqty analar kóp.
Máselen, tyl eńbekkeri Shambek Rahmanova 106 jasqa tolyp otyrsa, Hlaýda Keneldiqyzy, Kenje Ótkelbaevany, sondaı-aq Keńes Odaǵynyń Batyry Qarsybaı Sypataevtyń qyzy Naǵıma Júndibaeva da ǵasyr kýágeri atanyp otyr.
Ordabasy aýdanynda 8 naýryz – Halyqaralyq áıelder kúnine arnalǵan merekelik is-sharalar ǵasyr jasaǵan aq jaýlyqty analardy quttyqtaýmen bastaldy.
Aýdan ákimi Baǵlan Batyrshaev ǵasyr kýágerleriniń úılerine arnaıy baryp, ıyqtaryna oramal jaýyp, merekelik gúl shoqtaryn syılady.
1916 jyly 1 qańtarda dúnıege kelgen Shambek áje búginde Temirlan aýylynda kenje qyzy Altynnyń qolynda turady.
15 shaqty ul-qyz tárbıelep ósirgen altyn qursaq ana nemere, shóbere, shópshek, nemenesin qosqanda 150 den astam urpaqtyń qazynaly aqylshysyna aınalǵan.
Al, Uıaljar aýylynda turatyn Hlaýda áje naǵyz eńbektiń adamy bolǵan.
El basyna kún týǵan qıyn kezeńde er azamattarmen qatar ketpen shaýyp, shıetteı bala-shaǵasyn eńbekpen asyraǵan.
«Bir ǵasyr ishinde ult tarıhyndaǵy qanshama oqıǵalarǵa kýá bolǵan ájelerimizdiń ónegeli ómiri – barshamyzǵa úlgi. Aldaǵy ýaqytta biz júz jasaǵan qarttarymyzdyń ómir joly, jetken jetistikteri týraly derekter jınap, aýdan arhıvin jasaıtyn bolamyz. Sol arqyly óskeleń urpaqty ótken tarıhymyzben jan-jaqty tanystyrmaqpyz», dedi aýdan ákimi óz sózinde.
Badamdaǵy Kenje Ótkelbaevaǵa merekelik sálemin ala barǵan aýdan basshysy medıtsınalyq jáne áleýmettik kómek kórsetiletindigin jetkizdi.
Sonymen qatar, aýdan basshysy dańqty batyr Qarsybaı Sypataevtyń Badam aýylynda turatyn qyzy Naǵıma Júndibaevany kele jatqan mereıli meırammen quttyqtap, syı-sııapat kórsetti.
