Túrkistan oblysynda ejelgi ǵıbadathana tabyldy
«Kóne nysan eki myń jyl buryn ómir súrgen Kangıýı taıpasyna tıesili bolýy múmkin. Óıtkeni arheologtar dál osy taıpanyń tarıhy tolyq zerttelmegenin aıtady. ıAǵnı bul óńirde áli talaı ashylmaǵan syr jatyr. Arheologtar sońǵy jyldary Sozaq aýdanyna qarasty Qyzylkól mańynda qundy oljaǵa kenelýde. Tasyn túrtseń tarıh teberigi shyǵatyn aımaqta bul joly kóne zamanǵa tıesili ǵıbadathana tabyldy. Arheologııalyq jádiger zertteýshilerdi qatty qyzyqtyryp otyr», - dep habarlaıdy telearna.
«Birinshiden, bul Qazaqstan aýmaǵynda tabylǵan alǵashqy nysan. Kún sımvolıkasy men sáýlet óneri Kangıýı taıpasyna tıesili ǵıbadathana ekenin kórsetip otyr. Dinge qyzmet etýshiler osynda ádeıi joldanǵan bolýy múmkin. Ǵıbadathana aýmaǵy áli de zertteý jumystaryn talap etedi. Ázirge tek jer bederiniń ústińgi qabaty ǵana ashyldy. Belgili bolǵandaı sáýlet ónerine paıdalanylǵan qurylys bólshekteri ońtústik ólkege tıesili emes. Beriktikti qamtamasyz etken tastar arnaıy jetkizilýi múmkin», - deıdi Ońtústik Qazaqstan memlekettik pedagogıkalyq ýnıversıtetiniń professory Aleksandr Podýshkın.
Arheologııalyq qazbanyń nátıjesinde tabylǵan ǵıbadathana aýmaǵynda myńdaǵan keramıkalyq bólshekterdi kórýge bolady. Mamandar qumyra synyqtaryna úńilip onyń sý men dándi daqyldardy saqtaýǵa arnalǵanyn anyqtady. Tarıhy tereń qundy oljalardy izdeý jumystary áli de jalǵasatyn bolady. Arheologııalyq aýmaqta altyn men kúmis metaldy balqytýǵa arnalǵan tıgel de tabyldy. Mamandar jabdyqty din ókilderi qoldanǵan bolýy múmkin dep topshalap otyr.
Al ǵıbadathanaǵa jaqyn jerde sol zamanda jerlengen eki adamnyń qorymy bar. Onda tas pen shynydan, súıekten jasalǵan tarıhı mańyzǵa ıe júzdegen jádiger tabyldy.
«Eń birinshi tabylǵan jádiger qońyraý boldy. Onyń mańynda áıeldiń qasyn boıaýǵa arnalǵan zat tabyldy. Keıin monshaqtar men buıymdardyń shoǵaryn kezdestirdik. Adamnyń bas súıegi men jaq súıegi de tabyldy. Biz ony qaıta jınaqtaýǵa tyrystyq. Endi ǵıbadathana aýmaǵynan tabylǵan jádigerlerge ortalyqta arnaıy zertteý júrgiziledi. Mamandar kelesi jyly Qyzylkól mańynda qazba isi qaıta jalǵasatynyn aıtady», - deıdi OQMPÝ stýdenti Ekaterına Kesman.
Foto: 24.kz
